الحدث الأهم في تاريخ الشركة?! طلاق اول إنتاج لمفهوم BMW Neue Klasse

قطاع السيارات العالمي كله بلا استثناء تابع اطلاق العربية BMW iX3 .. لأنها أول تجسيد عملي لمفهوم Neue Klasse. 
 

وزي ما كتبت أمس المفهوم ده ظهر في بداية الستينات، وانقذ BMW من الإفلاس، وبعد الثورة الكهربائية في العربيات، اصبحت كل الشركات مهددة في ظل التوغل الصيني في العالم كله.

مجموعة BMW تنبهت للوضع ده من سنين وبدأت في وضع استراتيجية تقدر من خلالها مواجهة التغيرات الجديدة والبقاء كلاعب أساسي في قطاع السيارات العالمي.
 

مفهوم Neue Klasse  مش مجرد عربية ، هي عبارة عن كذا محور خليني احاول اشرحهم ببساطة

1 - تم توحيد هوية BMW الجديدة من خلال منصة واحدة متقدمة، تعتبر الأحدث في العالم واطلقوا عليها اسم Super brain أو الدماغ الخارقة ، بتتكون من أربعة أجهزة كمبيوتر عالية الأداء، بيوفروا أكثر من 20 ضعف من قدرة اجهزة الكمبيوتر الحالية للجيل الحالي من السيارات ، وحتبقى خطوط التصميم الرئيسية واحدة في كل عربيات BMW ، زي الشبكة الأمامية  Kidney Grilled والانحناءة المميزة في الزجاج الخلفي Hofmeister kink.
 

2 - ابتكروا نظام تشغيل جديد بالكامل اطلقوا عليه اسم " iDrive" بيعتبروه نقلة في التفاعل بين السائق والعربية ، بيتضمن الـPanoramic Vision ودي أهم ميزة في النظام، عبارة عن شاشة عرض معلومات ممتدة بطول الزجاج الامامي ده غير الـCentral Display وعجلة القيادة متعددة الوظائف.
 

3 - اعتمدوا على الجيل السادس من تقنية eDrive ، ودي بتوفر كفاءة بنسبة 25% وبتدي 30% مدى سير اطول، وكمان شحن بطارية اسرع 30%.
 

4 - ركّز المفهوم على مبدأ الاقتصاد الدائري، يعني التركيز على استخدام المواد الثانوية وإعادة التدوير في كل مراحل الإنتاج، لتقليل البصمة الكربونية للعربية طول فترة حياتها.

📌طيب بس دي عربيات كهربا.. حيجيبوا بطاريات منين❓

👈تصميم وتكنولوجيا البطاريات من BMW، بس الانتاج وزعوه على 5 شركات عالمية ، يعني، آدي شكل البطارية ومكوناتها وكل التفاصيل الخاصة بيها.. انت عندك مصنع بطاريات وعندك خبرة بالانتاج وسلاسل التوريد، من فضلك تنتج بطارياتي وتوردهالي.

📌طب ليه BMW معملتش موضوع الانتاج ده❓

👈لأنهم شافوا ان الاستثمار في التصميم والابتكار أهم وأفضل ، وان الانتاج ده قصة كبيرة محتاجة مليارات من الدولار والأهم محتاج وقت و "نوهاو" ، فالأفضل اعتمد على اسماء عملاقة في لانتاج، وانا اركز في التحسين والابتكار.

👈كمان طبّقوا استراتيجية "Local For Local" ، كل المكونات وسلاسل التوريد تكون قريبة من المصانع الخمسة المختارة لانتاج العربيات بمفهوم Neue Klasse.