اسلام حويلة يكتب :

الجيل الرابع من BMW X3 في مصر 2 سبتمبر وحكاية "The Ultimate Driving Machine"

BMW X3

قبل سنة 1975 كان شعار BMW "متعة القيادة"، وكان بيعبر عن فلسفة الشركة بالتركيز على متعة السائق وتجربة القيادة الديناميكية

لكن مع قرارBMW انها تتوسع في السوق الأمريكي في السبعينيات، واجهت تحدي كبير، لأن في الوقت ده كانت السيارات الألمانية تعتبر غريبة ومش جذابة للمستهلك الأمريكي، اللي كان بيفضل السيارات الكبيرة المريحة، ومكنش شعار "متعة القيادة" بالقوة اللي تخلي BMW تظهر في السوق.

في سنة 1975، قررت BMW التعاقد مع وكالة اعلانات اسمها (Ammirati & Puris) عشان تتوسع في امريكا. واجتمع المدير الإبداعي وكبير كتّاب الإعلانات في الوكالة، بوب سنكلير، ازاي يشتغلوا ويروجوا لسيارات BMW.

سنكلير كان شايف أن المشكلة مش في العربية نفسها، المشكلة حنقدمها ازاي؟

وكان شايف ان BMW مش مجرد وسيلة نقل، دي وسيلة للحصول على تجربة مختلفة وفريدة.. فقرّر انه يركّز على المشاعر اللّي بتثيرها BMW في السائق.

وفي ليلة ، نزل اتفرج على عربيات BMW في الباركنج ، وقال لنفسه: "دي مش مجرد عربية دي آلة قيادة، وبعدين صحح الأمر وقال عليها : إنها الآلة النهائية للقيادة.. "The Ultimate Driving Machine".

ونجح الشعار بشكل مذهل لاكتر من سبب، منها انه كان مختلف ومميز عن الشعارات التانية في السوق، اللّي ركزت على الراحة و الفخامة والسلامة.. هو ركز على جوهر العلامة.. الأداء.

كمان الشعار عمل استفزاز.. BMW مش مجرد وسيلة انتقال ، دي مصممة لمتعة السائق.. والأهم ان الشعار مكنش مجرد كلام.. كان بيعكس الواقع.

واتحول الشعار من مجرد جملة إلى هي جزء لا يتجزأ من الـ DNAلـBMW.

جلوبال أوتو وكيلBMW حتقدم الجيل الرابع من X3 في مصر يوم 2 سبتمبر، طبعا كلنا عارفين انها بتتّجمع في مصنع البافارية للسيارات، ومهم انك تعرف ان مصنعها الرئيسي "سبارتانبرغ" في الولايات المتحدة، وفي مصنع تاني ليها "روسلين" في جنوب افريقيا بس " right Hand".. وان جلوبال اوتو من الوكلاء القلائل حول العالم اللّي مسموح ليهم انهم يجمّعوا موديلات X.

وأعتقد وكعادة جلوبال اوتو،انها حتقدم X3 على الأقل نسخة BMW X3 20 xDrive ونسخة الـPerformance Mاللّي هي BMW X3 M50 xDrive.

الجيل الرابع نازل بأحدث نظام BMW iDrive مع QuickSelect المُستند إلى نظام تشغيل BMW 9.. والجديد ان كل محركات X3 نازلة مايلد هايبريد بجهد 48 فولت وده بيوفر قوة وكفاءة أعلى.. وكلها بناقل حركة ستيبترونيك 8 سرعات.

برضه مهم انك تعرف ان BMW X3 كانت اول عربية يتم تزويدها بنظام الدفع الرباعي الذكي xDrive ، من اكتر من 20 سنة وقت تقديم الجيل الأول ، وانها خلال الفترة اللي فاتت حققت مبيعات اكتر من 3.5 مليون عربية حول العالم