اسلام حويلة يكتب :

الفئة الأولى والثانية‼ أول موديلات BMW بدون حرف"i" في مصر

الفئة الأولى والثانية من BMW

👈يمكن تشوفه تغيير بسيط ومش فارق، لكن لو انت واحد من عشّاق BMW حتشوفه تغيير كبير ، خلاص مش ح نقول 330i ولا 525i ولا 760i ..مفيش حرف الـ"i" تاني

📌كتبت الكلام ده من سنة بالظبط ، وبمناسبة تقديم شركة جلوبال اوتو للفئة الأولى والثانية من BMW في السوق بشكل رسمي قلت أفكركم بيه تاني

👈في سنة 1969 ظهر حرف الـ"i" على موديلات BMW لأول مرة ، لمّا قدمت الشركة أول عربية بخاصية حقن الوقود (انجيكشن) وكان الموديل اسمه 2000 tii ، ومع الوقت انتهى دور "الكاربراتير" من موديلات BMW تماما وتم اعتماد حرف الـ"i" في كل عربيات BMW البنزين ، وحرف الـ"D" للديزل.

👈في مايو 2023 بدأ الكلام وشائعات ان BMW في طريقها لتخصيص حرف الـ"i" للسيارات الكهربائية ومش حيكون موجود تاني على أي عربية بمحرك احتراق داخلي.

📌ازاي.. يعني مش حنقول 330i ولا 520i ❓ يعني مش حنلاقي حد بينطق حرف الـ"i" ويتك عليه أوي عشان يفهمنا انه "بي ام باوي قديم"❓

لا سيدي معدش الكلام ده.

👈بيرند كوربر، نائب الرئيس الأول لعلامة BMW وإدارة المنتجات شرح الدوافع ورا التغيير ده ، وقال : رغم أن تفسيرنا لـBMW i كان دائمًا يتمحور حول الابتكار وليس فقط الكهرباء، إلا أننا قررنا الآن حجز هذا الحرف للدلالة على السيارات الكهربائية فقط، وذلك لتقليل الارتباك بين الطرازات مثل BMW i5، الكهربائية بالكامل، وBMW 540i التي تعمل بالبنزين، نود أن نحتفظ بـ 'i' كأصل، ونود أن نحتفظ به كتوقيع يدل على أنك تقود سيارة كهربائية، وكان هذا هو المنطق لدينا.

👈أول عربية خرجت من BMW بدون حرف الـ"i" كانت X3 واللي خرجت في الربع الأخير من 2024، وتم استبدال موديل M40i بـ M50، وهكذا على كل العربيات ، بس خد بالك احنا بنتكلم على فيس ليفت أو جيل جديد كليا، مش موديل سنة جديدة، يعني مش حتلاقي حرف الـ"i" على الجيل الجديد من الفئة الأولى والفئة التانية اللي ح يظهروا في الربع الأخير من السنة.

📌بالمناسبة .. سعر الفئة الأولى بيبدا من 2450000جنيه وسعر الفئة الثانية بيبدأ من 2650000 جنيه وفي نسخة رياضية منهم "M" بالتأكيد أغلى وأعلى أداء