تراخيص شهر أبريل : الناس اللي بتفهم عربيات.. رأيكم ايه❓

عندنا 15 موديل مستورد بيمثلوا أكتر من 35% من تراخيص الملاكي لشهر أبريل بإجمالي عدد 4886 عربية ، لو قسمناهم لـ3 شرائح سعرية تحت المليون ،وفوق مليون 800ألف جنيه ،وما بينهما حنلاقي التالي :

1️⃣تحت المليون جنيه 4 موديلات همّا بالترتيب MG5 بـ(288) رينو تاليانت (286) فيات تيبو (259) وبايك U5 (212) باجمالي 1045 عربية بنسبة حوالي 21%.

إقرأ أيضا للكاتب اسلام حويلة :

تراخيص أبريل : انخفاض في المبيعات ..نيسان على القمة وبايك في الطالع

 

2️⃣فوق المليون و800 ألف جنيه 6 موديلات همّا بالترتيب تيجوان(468) سبورتاج (448) توسان (438) كودياك (393) جيتور T2 (229) بيجو 3008 (203) باجمالي 2179 عربية بنسبة حوالي 45%.

3️⃣الفئة الثالثة (مابينهما) فيها 5 موديلات همّا MGZSبـ(441) قشقاي (412) كورولا (389) بايك X55 (220) وأخيرا MG One بـ(200) ،باجمالي حوالي 34%.

هل معنى ده ان اكثرية عملاء المستورد مش في بالهم ان السعر يكون منخفض أد ما يهمهم التصميم والجودة والتكنولوجي❓

أو ممكن نتساءل بصيغة تانية.. هل حجم شريحة العملاء تحت المليون تركيز الشركات عليها أقل نسبيا من الفئات التانية❓

بس خد بالك.. بايك U5 لمّا نزل سعرها، المبيعات تضاعفت 4 مرات، رينو تاليانت المبيعات تضاعفت 4 مرات، وده معناه ان لو توافرت عربيات بكميات أكبر وبنفس السعر حيعملوا مبيعات ضخمة.. وبالتأكيد معاهم فيات تيبو.

إقرأ أيضا للكاتب اسلام حويلة :

تراخيص السيارات الكهربا في أبريل : سمك..لبن.. تمر هندي

لكن السؤال الأهم هنا.. هل العربيات دي جذبت عملاء جداد للسوق ولا أخدت من عملاء التجميع المحلي❓

1️⃣الموديلات المحلية تحت المليون جنيه 8 موديلات بإجمالي عدد 2472 عربية، على راسهم نيسان صني (767) واوبترا (458) ، قلّت تراخيصهم عن مارس (3020) حوالي 550 عربية.

2️⃣فوق المليون جنيه 7 موديلات باجمالي 1075 عربية على رأسهم هيونداي AD (672) تيجو 7 (397).

عارف ان AD الفئة الأولى بـ970 ألف لكنى حسبتها "مجازا" فوق المليون لأن أغلب المبيعات بتكون في الفئة التانية والثالثة.

لو حسبنا المستورد والتجميع المحلي مع بعض حنلاقي ان الـ30 موديل من أصل 420 موديل، نسبتهم 65% من اجمالي تراخيص الملاكي في أبريل ، والعربيات تحت المليون جنيه نسبتها حوالي 26%. يعني ربع حجم السوق..