انت كتاجر عربيات عامل "ناصح"‼ متزعلش لما "تحرق" أضعاف اللّي كسبته🤌

مين بيحط أوفر برايس على العربية❓الوكيل ولا الموزع ولا التاجر❓أصلها بقت سخيفة جدا

تعالى ناخدها من بدري شوية.. فكرة انك وكيل تعلن عن سعر عربية وقت تقديمها في السوق وكل الناس تشيد بالسعر ده، لكن الحقيقة ان السعر ده للاستهلاك الاعلامي بس، على الأرض سعر تاني خالص.. أوفر برايس مستفز.
 

• يمكن اكون متفهم من سنتين انك كموزع أو تاجر تجيب عربية مثلا بمليون جنيه والدولار بيطلع، ف انت مشكلتك انك لمّا تبيع مش حتعرف تجيب اختها بنفس السعر، الاسعار كانت بتتغير الصبح وبالليل.
   

لكن حاليا ايه المبرر انك كوكيل تعلن سعر مالوش علاقة بالواقع، ما لو انت عارف ان العربية ليها زبونها المتعطش ليها، فقول سعر واحد تتباع بيه ، طالما انك عارف ان العربية حتبيع.. لكن انك تعلن سعر والموزعين ينفذوا بسعر تاني تبقى غير مقبولة بالمرة ⛔
 

• طب انت كوكيل مثلا اتفاجأت بأوفر برايس، فين صالات العرض بتاعتك، وليه مفيهاش عربيات؟ آه نسيت لقد نفذت الدفعة الأولى بالكامل.
   

انا معنديش اي مشكلة أو أزمة انك تسّعر عربية قيمتها مليون بـ10مليون.. انت حر والناس أحرار، لكن ليه تقول حاجة وانت عارف ان الحقيقة حاجة تانية خالص.
 

• وانت كموزع مبسوط انك "ناصح" وبتكسب ، ماشي، بس خد بالك انت بدأت اللعبة دي مع الزبون، فمتزعلش لمّا الزبون يخليك 🔥تحرق🔥 أضعاف اللي كسبته عشان "تسّيل" فلوسك.. الكلام ده حيحصل قريب أوي ، كلها شهرين تلاتة وتشوف.
   

وللجماعة اللّي بيجروا يشتروا باوفربرايس.. عارف انك تسببت بعرف بين قطاع العربيات كله، عارف ان الكل مقتنع ان الأوفر برايس بيخلّي العربية تبيع أكتر، عارف ان كل اللي دفعته كلها شهرين تلاتة وتلاقيك رميت فلوسك في الهوا.. كل اللي انت شايفه ده تسخين وحلاوة روح.. مفيش موزع أو تاجر في مصر كلها حيكسب "بحسبته" في 2025، انت حتشوف حرق مش طبيعي، وللوكلاء كمان.. انت شايف وموافق والبعض "متفق".. فبرضه متزعلش لمّا تلاقي عربيات المبادرة مغرقة مصر الفترة الجاية.
 

• بالمناسبة..اللي بيسأل عن علامة هونشي ووكيلها.. تقول تاني.. الوكيل مجموعة FBB في الأردن وليبيا ومصر ودي مجموعة متعددة الجنسيات مقرها دبي وحاليا بيتم تكوين فريق العمل وبحث التجميع مرة واحدة عشان العربيات كاستيراد 🔥غالية أوي🔥