تراخيص يناير: فولكسفاجن وأودي وسيات البريمو.. وزيكر تبدأ بـ2 مليون جنيه

السوق في يناير قفل 14148 عربية ملاكي، وده حسب تقرير تراخيص المرور، يعني أقل من ديسمبر بـ925 عربية، وده رقم مفاجىء للتوقعات اللّي أصلا مبنية على متابعة حركة البيع عند الموزعين والتجار ، الفكرة انك لمّا تسأل التجار والموزعين مش حتلاقي إلا اجابة واحدة "السوق وحش" إلا من رحم ربي ، يمكن في ناس تانية بتبيع ومحدش عارفهم.. ودي عادة مش عارف وارثينها ولّا عشان خايفين من العين.

على عكس الوكلاء ، لمّا تسأل في الغالب حيقولك زي الفل والدنيا تمام، صحيح تمام دي ممكن تكون 10 عربيات في الشهر وممكن تكون 1000 عربية.

رقم واحد زي ما قلنا امس علامة نيسان بـ1777 وحدة والمركز الثاني علامة هيونداي بـ1514 وحدة والثالث علامة شيري بـ1463 وحدة والرابع علامة MG بـ1400 وحدة والخامس علامة مرسيدس بـ783 وحدة.

لازم تبقوا عارفين ان شغل المبادرة شغّال زي الفل ، وكله يعمل حسابه ان في 250 ألف موافقة مبادرة صالحة 4 سنين وشوية ، يعني متوسط 60 ألف عربية حتترخص في السنة بحد أقصى، يعني أي وكيل عامل حسابه ان الاستيراد الشخصي وقف مطلوب براجع حساباته.

في علامات أدائها زاد عن ديسمبر زي فولكس فاجن زادت اكتر من الضعف ومعاها أودي وسيات بنسبة كبيرة، وفيات بنسبة بسيطة ، الباقي في تراجع في المبيعات ، يمكن في علامات آداءها يعتبر ثابت زي رينو وجيتور وسكودا.

العربيات الكهربائية نزلت عن المتوسط بحاجة بسيطة ..تراخيصها 472 وحدة ، بس الملاحظ ان موديلات فولكس فاجن الـ IDبتقل شهر عن شهر، وده لصالح BYD Song بموديليها البلس والـ L وطبعا كبيرة الاستيراد الشخصي "مرسيدس".

وده ينقلنا لنقطة تانية، زيكر حتتقدم خلال أيام بموديل X وده على نفس منصة فولفو وسمارت والسعر اللّي بلغني بشكل غير رسمي 2 مليون جنيه ، والموديل الثالث 01 حيتقدم بسعر 3.25 مليون جنيه، ودي أرقام كويسة وغير طبيعية شركة جيلي نفسها اللّي بتغالي في أسعارها زي ما سعّرت ستارراي.