اسمها سمارت هاشتاج 3 وهاشتاج 1.. أمّا جيلي دي عليها حركات يا جدع

من خمس سنين بالظبط (يناير 2020) حصلت شراكة استراتيجية بين مجموعة دايملر بنز الألمانية ومجموعة جيلي الصينية، بمقتضاها تم الاعلان عن شركة جديدة خالص مهمتها الاساسية والوحيدة اعادة إحياء علامة سمارت الكهربائية مرة تانية، بس المرة دي بإدارة وتطوير وهندسة جيلي الصينية، دور دايملر أو مرسيدس كان مقتصر بس على اسم العلامة فقط لا غير.

طبعا كانت حركة في منتهى الذكاء من مرسيدس انها تخلص من الهم اللي اسمه سمارت، خسارة حوالي 4 مليار يورو رغم محاولات التطوير الكتير على سمارت، في النهاية نزلت في وقت غلط وبحجم غلط.

المعلم لي شوفو رئيس جيلي أخد العلامة و "ونفضها" من التراب، وطلع موديلين تلاتة "عجب" وبتاع 15 كونسبت او نموذج اختباري، يعني "عمل من الفسيخ شربات".

وفكرة سمارت عشان تبقوا عارفين شركة سواتش للساعات، الفكرة بدأت عندها، بس قلة الخبرة كشفت عن ضرورة البحث عن شريك محترف، وبالفعل بدا الرئيس التنفيذي، نيكولا هايك الدخول في مفاوضات تقريبا من نص شركات العالم في الوقت ده ، لغاية ما عرف يقنع مرسيدس بالشراكة، بس مرسيدس رفضت تماما اسم سواتش موبايل، وعملوا علامة سمارت اختصار لاسم الشركة Swatsh Mercedes ART.

المهم سمارت حاليا عندها 3 موديلات (#1 و #3و#5) بس الأخير لسة طالع "طازة" ميلحقش يوصل عندنا، وعشان كده حنشوف بكرة الصبح (الثلاثاء) موديلين سمارت الأحدث #1 و#3 اللي حتقدمهم شركة عزالعرب بعد ما أعلن عن حصوله على الوكالة من فترة.

ياعم ايه الرمز ده اللي كاتبه؟

ايوة ياسيدي، مش قلنا موبايل وحركات ، الموديل اسمه كده هاشتاج 1 او هاشتاج 3 ، الناس حبوا يدلعوا الموديلات بتاعتهم .. هاشتاج من "الهشتكة" سهلة يعني، أكيد بهزر ، فكرة استخدام هاشتاج ده راجع لفلسفة سمارت الجديدة باستخدام رموز Wingdings ودي رموز او اختصار لـ"كتابة او رسم أوايموجي" وكانت مستخدمة في التسعينات قبل ما يظهر الحاج "ويندوز" لصاحبه الحاج بيل جيتس.

وبرضه مهم اننا نعرف ان سمارت وفولفو EX30 بيشتركوا في نفص المنصة او البلاتفورم، ومعاهم كمان زيكر X ، وسعرهم برضه يعتبر واحد في الأسواق، مثلا سمارت تزيد عن EX30 حوالي 100 جنيه استرليني في بريطانيا.