امجراند حصريا وفقط‼ ما قلنا تجربة وكيلين لـ"جيلي" مش ناجحة😎

في نص شهر يناير شركة اوتوموبيليتي حتقدم جيلي امجراند للسوق المصري، الاعلانات التشويقية او التمهيدية حتلاقي فيها كلمة حصريا وكلمة فقط، يعني رسالة واضحة ان امجراند حتتقدم عن طريق الوكيل شركة اوتوموبيليتي ، ويبدو أن الوكيل شركة أبوغالي موتورز مش حيشارك في بيع العربية في مصر كما جرت العادة في العربيات المستوردة من جيلي.

🔥وده يرجعنا للمربع الأول.. هل تجربة وكيلين في مصر ناجحة رغم وجود شركة أم بتنسّق العمليات وبتسّعر الموديلات؟🔥

مش لازم الفكرة اللي تنجح في سوق ما في بلد ما تنجح في بلد او سوق غيرها، يعني ان كان في مقاطعة واحدة في الصين 12 وكيل لعلامة جيلي كما قال سابقا السيد مايكل سونج مدير عام جيلي اوتو، فليس بالضرورة ان تنجح تجربة وكيلين في بلد زي مصر.

😎ما علينا .. نرجع للعربية نفسها😎

امجراند عشان كله يبقى عارف هي في نفس فئة هيونداي النترا AD، يعني بعيد تماما عن نيسان صني وهيونداي اكسنت، العربية من حيث الأبعاد أكبر "هبابة" من الـ AD، وأقل "هبابة" برضه في القوة والعزم، لكن حجم الشنطة في امجراند اكبر بشوية حلوين، والاثنين بناقل اوتوماتيك عادي من 6 سرعات.

يعني تسعيرها الطبيعي زي ما قلت قبل كده حيكون ما بين 900 ألف الى مليون و100 ألف جنيه، م الآخر وفي اعتقادي انه لازم يقل عن الـ AD بحوالي 70 ألف جنيه ع الأقل، لأن المقارنة بين الاثنين في حال تساوى السعر أو تقاربه ح تصب لمصلحة الـ AD.

جيلي امجراند ملهاش علاقة من قريب أو من بعيد بالنسخة اللي نزلت مصر واتجمعت محليا باسم امجراند7 ، امجراند عربية متواجدة في الخليج ,واسعارها مش قليلة، فيها تكنولوجي كتير وخامات بجودة عالية ، مثلا في السعودية سعرها بيبدأ من 61300 ريال سعودي بالضريبة ، يعني 835000 جنيه، يعني يادوب تتسعّر بـ900 ألف جنيه ، لكن برضه كل شيء وارد، وفكرة التجميع المحلي يعني استثمار على المدى الطويل، فحسابات المكسب والخسارة بتتعمل على سنين مش على سنة أو اثنين.