"لؤم" رامي جاد وأسعار رينو الجديدة .. تعالى اشتري ومتفكرش

في شهر فبراير دار بيني وبين رامي جاد مدير علامة رينو في مصر مكالمة ، كان الدولار وصل في السوق الموازي لـ71 جنيه ، وسألته السؤال المعتاد في الفترة دي.. حتعلن عن الأسعار الجديدة لرينو بالزيادات إمتى؟
رد وقالي انا مش ح أزوّد تاني، انا أعلنت عن الأسعار من شهر، ارفع تاني ليه؟
قلتله الطبيعي بتاع الشركات ، كل ما الدولار يزيد أسعار العربيات تزيد.
كان رده انه شايف ان سعرالدولار بـ71 جنيه مش حيستمر وحينزل خلال شهرين بالكتير، فمش طبيعي ازوّد والشهر الجاي انزل بالأسعار أو نصا زي ما قال،انا مش ح أبيع عربيات بالاسعار دي، ف ليه اطلع السلم اللي ح انزله تاني؟!
كلمته بعد التعويم وسالته شايف الجاي شكله ايه ؟ قالي خير كتير بس المهم الدنيا تفضل على حالها وميحصلش صعود تاني.
من ساعات معدودات، رينو أعلنت قائمة الاسعار لموديلاتها ، فيها تخفيضات وصلت مثلا على أول فئة من اوسترال 330 ألف جنيه.
ودي كانت مفاجأة بالنسبة لكتير، لأن آخر قايمة لرينو كانت في يناير وقت الدولار ما كان بـ50 جنيه تقريبا ، يعني تقريبا زي سعره الحالي.
أسعار رينو الحالية المفترض إنها ح تسبّب احراج لمنافسين ح يضطروا ينزلوا بالأسعار عشان المنافسة، رامي بـ"لؤم" الثعالب، ساب السوق ينزل ، وهوب راح منزل قائمة واقعية وبتقول للعميل تعالي اشتري وما تفكرش.

تحية لرينو على التخفيض وتحية لرامي جاد أو زي ما بيقول دائما في نهاية أي بوست .. شكراً

بالمناسبة .. في مجموعة مش قليلة من العربيات الجديدة كليا على السوق حيتم طرحها ورا بعض بداية من النص التاني من مايو ، يعني بدون مبالغة حتلاقي كل اسبوع عربية جديدة من شركة، فيها الـIce وفيها الـBev ومنهم طبعا رينو كارديان