اسلام حويلة يكتب : الحوت الكبير والاوفر برايس ..يا آه يا آه

فاكرين الاعلامي خيري رمضان وقت ثورة يناير لمّا فتحوا باب التبرعات لمصر، واشتغلت الاتصالات من كل حدب وصوب ، اللي يتبرع بـ50 الف واللي يزوّد لـ100 الف لغاية ما قلبت مزاد تبرعات  ويا عيني ويا سيدي على حب الوطن ، وفي النهاية الحفلة اللي اتعملت طلعت على "فاشوش" وشوية النقطة اللي "اتلمت" كانت تكسف.

أهو نفس الكلام شغّال اليومين دول ع الأوفربرايس ،حالة من الاحتفاء والاحتفال بنزول الاوفر برايس على اسعار العربيات سواء نزول كبير او حتى الغاؤه من أساسه ، الّلي هو محدش أصلا عارف سعر لأي عربية غير وكيلها، و "والله" سألت مسؤول كبيرفي احد التوكيلات عن سعر عربية عنده مكنش فاكر من كتر تغيير الأسعار.

طيب الوضع ايه؟

كل الأسعار اللي حضرتك بتسمعها في "الأونطة" أساسها شركة قديمة في السوق و"تقيلة اوي" ، عندها مخزون يسد عين الشمس، كل 3 ساعات واقل بلا مبالغة يخفض في سعر العربيات ع "فيسبوك" قوم السوق تباعا ينزل معاه وكله على "فيسبوك" لغاية ما كل "مواطن تاجر" بطنه تتكركب ويجري يبيع بخسارة على امل يوقف نزيف الخساير، ويخرج من السوق بخسارة أكلت كل اللّي كسبه السنتين اللّي فاتوا ، ماهو مش صنعته برضه.

أمّا الكبير أوي والتجار الكبار محدش فيهم بيبيع عربية ، بل بالعكس باعتين صبيان معاهم شنط الفلوس يصطادوا عربيات "المواطنين التجّار" بأبخس الاسعار.

يعني "نقطة" الاوفر برايس  وامتناع وكلاء عن البيع لمدة 6 شهور وحرق الأسعار ، دي كلها معمولة عشان السوق يتصفى من الجمعيات الدايرة والـ"سلزجية" اللي فتحوا معارض على حس الاستيراد الشخصي ومكسب الاوفربرايس.

بالمناسبة.. السيد هشام عز العرب رئيس مجلس ادارة عز العرب للسيارات أكد ان بروتون المجمعة محليا حتكون أرخص عربية في مصر