اسلام حويلة يكتب :

بداية حرب الاسعار (1).. ايه اللي حيحصل في السوق؟

هيونداي اكسنت RB

بإعلان مجموعة غبور تخفيض اسعار هيونداي اكسنت RB وموديلات شيري النهاردة ، تقدر تقول ان المنافسة بدأت بجد ، أو ممكن نستعير جملة "حرب الاسعار" من السوق الصيني.

سيبك من أسعار العربيات المستوردة.. كلها شكليات ، تهتم بس لمّا تتوفر في السوق ، وده مش حيحصل اليومين دول خالص باستثناء نيسان اللي حتستقبل دفعة كبيرة من قشقاي وجوك خلال اليومين الجايين.

كتبت قبل كده ان نيسان صنى هي مؤشر السوق ، ولمّا نزلت قوائم الاسعار بعد التعويم حافظت صني على أسعارها ، وكانت الأرخص في السوق بعد BYD F3 مع الفروقات الكبيرة بينهم.

لكن مع أسعار هيونداي اكسنت RB اللي بقت أقل فئة أوتوماتيك منها أرخص من نيسان صني المانيوال، فالوضع اختلف، الأفضلية قولا واحدا بقت لاكسنت ، واكسنت حسب الارقام هي الأكثر مبيعا في شهر فبراير الماضي.. وده معناه ان اسعار صني حتنزل بشكل رسمي قريب لأن المنافسة ح تجبرها على كده.

طب ما صني حتنزل في السعر وخلصنا.. فين حرب الأسعار دي؟

في الربع الأخير من السنة حتشوفها يا حلو ، لأن الملعب حيتملي لعيبة، وان كنت ناسي افكرك.

بحسب تصريحات رسمية حيبقى عندنا في الربع الاخير:

- بروتون ساجا .. السيد هشام عزالعرب وصفها بأنها حتكون ارخص عربية في مصر.

- شيفروليه نازلة بعربية سيدان اقتصادية طالعة من مصنع جنرال موتورز مصر وحتكون بديلة لأوبترا

- ام جي حتنزل بموديل سيدان هو أصلا محقق مبيعات كبيرة وهو مستورد.. فما بالك لمّا يتجمع محلي؟

- اوعى تنسى جيلي : اوتو موبيلتي اعلنت ان الانتاج حيكون في الربع الأخير ، الكلام المنتشر في السوق انهم عربيتين مش واحدة ، سيدان وSUV وغالبا السيدان حتبقى اميجراند الشكل الجديد.

بالمناسبة .. احد كبار السوق شغّال حرق في نيسان صني بقاله فترة رغم انه مش موزع معتمد ، نازلة حوالي 40 الف جنيه عن السعر الرسمي