كاش باك من اوبل وشيفروليه و MG.. المال الحلال أهو

النهاردة شركة المنصور للسيارات أعلنت عن أسعار موديلات شيفروليه وأوبل و MG الجديدة ، واللّي شهدت انخفاض في الاسعار بنسب متفاوتة ، لو بدأنا بأوبل حنلاقي ان الانخفاض كبير وده أمر منطقى وطبيعي للعربيات الجاية بـ"زيرو" جمارك ، لأن فرق سعر الدولار كبير ولسة ح يكبر تاني.

اما شيفروليه و MG الوضع مختلف شوية، جايين من الصين أو بمعنى أدق عليهم ما مجموعه 67% رسوم وجمارك وضرائب ف فرق سعر الدولار البنكي قابله فرق سعر الدولار الجمركي وعشان كده الانخفاض في السعر النهائي كان اقل بكتير من اوبل أو الاوروبي.

الملاحظ هنا ان المنصور للسيارات وضعت شرط هام جدا للعملاء قالت فيه ، ان لو حدث أي انخفاض في الأسعار حتى يوم 15 يونيو المقبل ف الشركة ملزمة بسداد فارق السعر لأي عميل اشترى بالسعر المعلن .. ولو رجعنا 3 سنين ورا حنفتكر مشكلة محركات سيارات اوبل استرا ، واللي تحملت الشركة شراء كل عربيات العملاء وعوضتهم كمان عن أيام "العطلة".. ودي تقريبا محدش عملها قبل كده من شركات السيارات في مصر.

طيب السؤال حاليا هو الأسعار حتنزل تاني؟

طول ما الدولار بينزل سواء في البنك او السوق الموازي فاسعار العربيات حتنزل.

طب هو سعر الدولار حينزل تاني؟

المعطيات كلها بتقول ان السعر في اتجاه الانخفاض لغاية 40 جنيه أو أقل ، بس طول ما انت في مصر متقدرش تجزم بحاجة زي كده ، الاضطرابات حواليك في كل حتة، ومحدش عارف ممكن يحصل ايه بكرة

بالمناسبة.. حتى اللحظة مفيش انخفاض لعربية تجميع محلي، الكل في انتظار مجموعة غبور ونيسان مصر حيعملوا ايه؟ بس عشان تبقى عارف فيه مشكلة في توريد المكونات المحلية اللي اتجابت بسعر 72 دولار، وحاجة م الاثنين يا يتم الانتظار شهرين تلاتة حتى اعلان تخفيض الاسعار ، او يتم الاعلان والخسارة تتعوض مع الوقت