الدولار زاد 1.5 جنيه.. هل أسعار العربيات اللّي نزلت حتطلع شوية؟

بتحضرني مقولة المهندس محمد عبدالمنعم سعودي في وصفه الدقيق لسوق السيارات لمّا قال "عدم استمرارية الاستقرار"، وازاي ان سوق السيارت في مصر ماشفش خمس سنين "متصلة" في هدوء واستقرار، ولمّا ترجع بذاكرتك فعلا مش حتلاقي المدة الكافية واللي تنفع استثمار طويل.
البارح سعر الدولار زاد حوالي 90 قرش واليوم 50 قرش يعني خلال يومين زاد 1.5 جنيه في بعض البنوك، يعني الدولار بيقول للعشمانين في نزول اكتر.. اكتر دي تبقى .. ولا بلاش.
يوم الخميس 26 اكتوبر 2023 نشر موقع العربية تقرير بعنوان سعر الدولار في مصر يسجل مستوى قياسياً جديداً بالسوق الموازية ، واتكتب ان السعر وصل 50 جنيه.
في نفس اليوم في شركات رفعت أسعار عربياتها واستمر الارتفاع يوم بعد يوم ، بس لمّا تيجي تحسب سعر العربيات يوم 26 اكتوبر وسعرها حاليا وبعد التخفيضات مع احتساب فرق سعر الدولار الجمركي الجديد ، حتلاقي انه لسة في نزول اكترمفترض يتم.
بس ده كلام في الهوا مش عليه جمرك ،لان الشركات وهي بتسّعر لازم تعمل حساب التغيير في العملة في وقت لسة مفيش فيه اي استقرار وقدّامنا شهرين تلاتة على ما نقول يا هادي..
هل معنى كده ان اسعار العربيات اللي نزلت حتطلع شوية؟
معنى كده ان فكرة العاطفة والخيال في البيزنس ملهومش مكان، وده اللي شركات كتير بتعمله ، ناس تطلع تقول خليها تصدي ، غيرهم يقول محدش يشتري ، تطلع ناس تقولك الاسعار لسة حتنزل اكتر.. أهو كله كلام ابن عم حديت.
لأن مثلا مش شروط صندوق النقد الدولي انك تفتح الاستيراد على جميع السلع "مش الاساسية بس" وده معناه لو الدولة مقدرتش خلال الشهرين تلاتة انها توفر دولار للاستيراد فده معناه ان الطلب ع السوق الموازي ح يكتر وبالتالي الدولار حيروح لمستويات ما قبل التعويم.
بالمناسبة.. تخفيض الاسعار اليومين دول تريند ، بس الوضع ع الأرض لا فيه بيع ولا شراء، والجديد ان شركة مصر حلوان اعلنت عن اسعار عربيتها الجديدة بيستون B70s واللّي حتبدأ من مليون و 325 الف جنيه