اسعار العربيات.. الاوروبي يقل 25% والصيني يقل 5%.. طب والمحلي؟

السؤال المهم حاليا في سوق السيارات هو الأسعار حتنزل ولا حتطلع؟

بس السؤال الأهم هو الشركات ح تعلن عن أسعار عربياتها امتى؟

ده اجابته سهلة.. اسال الشركات نفسها؟

خلينا نقسم الشركات لثلاثة انواع.. مستورد من الاتحاد الاوروبي ، ومستورد من خارج الاتحاد الاوروبي ومستورد مكونات صناعة.

خلينا نبدأ من الآخر .. شركات التجميع المحلي ودول الأوفر حظا لانه تم فتح اعتمادات من البنوك اليوم بالفعل ليهم ، وبسعر محترم جدا، وده ح يخليهم يسعرّوا بـ"مزاج عنب" ، وبناء على تسعيرهم حتتحدد اسعار اغلب العربيات باستثنناء "الفواخر".

بالنسبة لمستوردي السيارات من خارج الاتحاد الاوروبي وتركيا وبريطانيا ، فالحسبة بتاعتهم معقدة شوية ، لأن اجمالي ما يتم دفعه من رسوم وضرائب وغيره على عربياتهم 67% يعني بدل سعر دولار جمركي 30.9 حيبقى افتراضا 50 جنيه وبالتالي في تكلفة اضافية كبيرة نوعا ما ، في المقابل لو ثبتنا سعر الدولار الحر بـ50 جنيه سواء لقيمة العربية او لسعر الشحن ، فحسبة التكلفة حتى خروج العربية من الميناء – بدون حساب اي تكلفة او ارباح-  حتقل بالميت 5%عن السعر الحالي لو ،وبقول لو، كان التسعير الحالي على 70 جنيه للدولار.

أما بالنسبة لمستوردي السيارات من الاتحاد الاوروبي وتركيا وبريطانيا، ف العين عليهم، لأن اجمالي الرسوم والضرائب 19% من سعر العربية، و لو ثبتنا سعر اليورو بـ54.95 جنيه للافراج الجمركي بدل اليورو الجمركي بـ34.95 جنيه ،والشحن والاستيراد بدل الـ74.95 جنيه اللي التسعير كان على أساسها –مشيها مش لازم تدق يعني- يبقى سعر تكلفة خروج المنتج من الميناء اللي هو العربية ، حينزل 25% بالميت.
 

طبعا كلامي كله على العربيات أقل من 1600 سي سي

بالمناسبة.. تكلفة الوكيل وأرباحه بيتم تحميلها ع العربية بعد كده، وهنا ييجي دور "نيسان صني".. حسب تسعيرها، بمعنى ان المنافسين لازم يكون سعرهم قريب من "صنى" وده حيحصل حيحصل، وغالبا ح ييجي على حساب الارباح والا مش حيبيع.