عميل تيجوان وكودياك المستهدف🎯وحالة خاصة لكوبرا تيرامار🔥

فولكس فاجن تيجوان وسكودا كودياك متصدرين تراخيص العربيات الأوروبية بشكل عام وطبعا فئة الـSUV، وهنا محتاجين نحدد نوعية العميل أو نعرف طريقة اختياره للعربيتين دول تحديدا.

رأيي انه عميل مش بيفكر خالص في كل ماهو صيني "بنزين" ، ممكن يكون عميل سابق لـBMW ومرسيدس ونزل مع ارتفاع الأسعار، أو عميل مش قادر عليهم حاليا ، ومع التحول الحاصل اعتقد ان العميل ده هو المستهدف لعلامات الـREEV أو الـBEV الفاخرة، يعني ممكن يفكر مثلا في Li Auto أوAito   لمّا تنزل، في كوبرا تافاسكان الكهربا ، وهو مختلف كليا عن عميل توسان وسبورتاج.

بالمناسبة كوبرا⬅هي وسيات بيتعاملوا في العالم كله باعتبارهم كيان واحد ، نفس الادارة العالمية، نفس الوكيل، نفس صالات العرض ،نفس مراكز الخدمة، حتى ادارة العلامتين.. واحدة.

سيات وكوبرا مرخّصين 5750 وحدة، لكن اللافت للانتباه كوبرا تيرامار، اتقدمت في ابريل 2025 وخلال 8 شهور رخّصت 1167 وحدة، علامة تعتبر جديدة نسبيا وموديل جديد كليا.

عميل تيرامار شبه عميل BMW، متعة القيادة والحيوية والنشاط، وعشان يغير لكهربا حيروح برضه لتافسكان، مش حيخرج بره كوبرا.

بيجو في 2025 هي أفضل علامات مجموعة ستيلانتيس، مع استبعاد علامة فيات طبعا، وطبيعي ان 3008 تكون  رقم 3 في الـSUV الأوروبي ، لكن لاحظ وجود علامة أوبل في الترتيب التاني على حساب ستروين، جراندلاند تراخيصها مرة ونص C5 ، ومعتقدش ان حداثة الموديل السبب لان اجمالي تراخيص علامة أوبل 2460 وحدة في مقابل 2318 لعلامة ستروين، مع الوضع في الاعتبار وجود موديل CX4 المجمّعة محليا.

رينو داستر رقم 5 في الترتيب⬅الشكل الجديد فارق كتير وده منعكس على التراخيص، داستر الجديدة اتقدمت في مايو ومتوسط تراخيصها في الشهر 164وحدة، الشكل القديم متوسط تراخيصه كان 103 وحدة.

يتبع >>>