مش مجرد علامة LI Auto الـDominant Leader لتكنولوجيا الـREEV في مصر يوم 10 ديسمبر

👈حتى اللحظة⬅️المشكلة الرئيسية لعربيات الـBEV هي القلق من مدى السير، ولغاية ما يبقى الطبيعي ان البطارية تمشيك 1000 كيلومتر ع الأقل حتفضل المشكلة دي عائق كبير خارج الصين.

📌كل الشركات المصنّعة عارفة ده كويس، عشان كده حتلاقي الشركات الصينية شغّالة ع الأقل على اتنين من الثلاثة سواء الـBEV أو الـPHEV أو الـREEV.

👈شركة Li auto زي ما كتبت من يومين تعتبر الـ Dominant Leader أو القائد المهيمن في تكنولوجيا الـREEV ، شركة ناشئة بدأت 2015، مؤسسها رجل الأعمال الشهير Li Xiang – بالمناسبة ده اسم Li Auto بالصيني- شاف ان المشكلة اللي حتقابل العميل في الـBEV هي مدى السير، فقرر انه يبدأ على طول بتكنولوجيا REEV، وتعتبرLi Auto  أول شركة صينية تشتغل على التكنولوجيا دي.

👈كمان مهم انك تعرف ان فكرة الـREEV بقالها سنين طويلة، والبداية عالميا كانت مع جنرال موتورز بموديل فولت ، وفي اوروبا مع BMW مع i3 ، وعشان كده بيتم وصف Li Auto بأنها زي ما قلت الـ Dominant Leader في تكنولوجيا الـREEV.

👈شركة Li Auto عندها 7 موديلات ، 3 منهم BEV و4 موديلات REEV ودي اللي حتنزل مصر ، مش لأني عندي المعلومة ، لأن ببساطة لسة موديلات الـBEV مش متاحة للتصدير.

📌كل موديلات Li Auto بتبدأ بحرف L عندنا L6 و L7 بـ5 مقاعد و L8 و L9 بـ6 مقاعد ، وكلهم SUV، الفئة الأعلى أو الـFlagship هيL9

👈مصر اول دولة يتم اطلاق العربية فيها يوم 10 ديسمبر الجاي من بين دول الشرق الاوسط و أفريقيا وأوروبا، ده شيء مهم وليه دلالة مهمة ، الشركات بره شايفة مصر بصورة مغايرة لكتير مننا، شايفين سوق عملاق جاي ، شايفين نمو واستقرار اقتصادي.

📌كل الشركات الصينية كبيرة أو صغيرة عندها هدف التواجد في السوق المصري عشان عارفين ومتأكيد اننا جايين..