موجة تخفيضات جديدة لأسعار العربيات الأوروبي جاية.. والسبب فولكسفاجن تايرون

حضرت التقديم العالمي لفولكسفاجن تايرون في معرض باريس 2024، يعني من حوالي سنة و10 ايام بالظبط ، ومن ساعات كنت حاضر تقديمها في مصر، وبين التقديم العالمي والتقديم المحلي فترة كبيرة دفعتني لسؤال السيد هنريك كايسر مدير فولكس فاجن في مصر وليبيا والجزائر عن سبب التأخير.

👈السيد هنريك قال ان الطلب على العربية في اوروبا كان كبير جدا ولا يزال، وان مصر أول دولة في المنطقة يتم تقديم تايرون فيها ، وكان من الصعوبة تقديمها في وقت سابق.

📌طبعا حديثنا تطرق الى سلسلة I.D الكهربائية وامتى ممكن نشوفها في مصر لكن خلينا في تايرون صاحبة الحدث دلوقتي.

👈فولكس فاجن تايرون نازلة بسعر ممتاز، مكنتش متوقع انها تكون أقل في السعر من سكودا كودياك، لأن غير ان فولكس فاجن كعلامة المفترض أعلى من سكودا ، كمان العربية نازلة فئة واحدة Fully Loaded بنظام R Line الرياضي 7 مقاعد ، يعني لو حتتقارن بشكل دقيق يبقى مع فئة سبورت من سكودا كودياك اللي بسعر 3 مليون و100 ألف جنيه.

👈وعشان تنزل بسعر 2 مليون 690 ألف جنيه فده معناه ان الوكيل بذل مجهود ضخم ومحترم للحصول على السعر ده، وده سعر ليه معاني كتير

 1️⃣ اذا قدرت تاخد من "الألمان" سعر كويس ، فيبقى مفيش علامة تانية عندها حجة.

2️⃣ ان ده بيقول ان أسعار عربيات أوروبية كتير مضطرة تنزل للمرة الثالثة ، لأن لمّا تكون اكبر وأحدث عربية سعرها أقل أو قريب من سعر عربية أقل في الحجم والحداثة ، فالمنافسة محسومة لصالح تايرون.

👈طبعا أول عربية سعرها حينزل بلا شك فولكس فاجن تيجوان ، ماهو لازم سعرها يبعد عن "الوحش" تايرون بحبة حلوين.. و فولكس فاجن مصر حتنزل بقائمة سعرية بكرة فيها تخفيض لسعر تيجوان 2026.

بالمناسبة.. وكيل فولكس فاجن نظم اختبار قيادة على هامش تقديم تايرون.. سعر وامكانات العربية ممتازة.. تستاهل طبعا