تراخيص 6 شهور.. هل حصل تغيير في السوق❓أيوة المبيعات زادت والترتيب كالعادة‼️

👈عدد تراخيص سوق الملاكي في النص الأول من 2025 بلغ حوالي 94229 وحدة.. وده أقل من المتوقع، صحيح هو أكتر بكتير من نفس الفترة سنة 2024 واللي بلغت 65443 وحدة، يعني نمو 60%، لكن سنة 2024 كان ليها وضع خاص بسبب مشاكل الـ ACID Number.

👈توقعات ان السوق يقفل في 2025 حوالي 230-240 ألف عربية، كانت مبنية على 120 ألف عربية استيراد (الكوتة) وزيهم تجميع محلي.. وده يخلينا نسأل..

📌ليه السوق مكبرش بالصورة المفترضة❓

1️⃣ نقص مكونات الانتاج.. ودي واضحة جدا في كل العربيات المجمعة محليا، إمّا تأخير اطلاق العربية شهور ، او عدم وجود انتاج كاف.

واعتقد مش محتاج أمثلة.. كل الانتاج المحلي باستثناء صني و AD ولو شفت نيسان سنترا وهيونداي اكسنت ، ممكن نتصور ان المكونات كانت في اتجاه اكتر لصني و AD.

2️⃣ تخفيضات الأسعار.. زي ما ناس كتير حتلاقيها فرصة للشراء.. ناس أكتر حتخاف وتستنى مزيد من الانخفاض.. مش لازم يكون في نفس الموديل او العربية.. ممكن الانتظار لوجود فرصة أفضل في موديل تاني متوقع اسعاره تنزل.

3️⃣ انتظار وترقب كتير من العملا لموديلات حتنزل جديدة.. زي شانجان CS55 Plus مثلا ، اصبر شهر ولا اثنين واترقب فرصة أفضل.. سواء شانجان نفسها او ما ترتب عليها من تخفيضات زي MG وشيري.

4️⃣  تأخير وعدم انتظام خطوط الشحن البحري بسبب الأزمات الجيوسياسية ، وده بتشوفه واضح في التقارير الشهرية ، علامة في شهر تبيع كويس جدا وبعدها بشهرين هدوء والشهر الرابع ترجع ترفع تاني.

👈نيجي لأكثر 10 موديلات رخّصوا في النص الأول من 2025 (الرسم في الأسفل)

👈نيسان صني خلاص حجزت المركز الأول سنة 2025، باين من الأرقام انها في حتة لوحدها وبقى الكلام عنها مكرر كل شهر.

👈نفس الشيء لهيونداي AD المركز التاني محسوم برضه في 2025 وباقي المراكز وارد يحصل تغيير فيها لان الأرقام متقاربة.

📌بالمناسبة.. الـ10 موديلات دول بيمثلوا 36.8% من حجم سوق الملاكي في مصر