علامة KAIYI.. نقطة ومن أول السطر وشكر خاص لـ Mr. Jiang Sheng

حضرت مؤتمر شركة (KAIYI AUTO) السنوي للأعمال ، وبحكم مهنتي كصحفى من 25 سنة، دايما بحاول الحصول على المعلومة من مصادرها، بهتم بتفاصيل صغيرة عشان اقدر أبنى رؤية جيدة.

خلال توزيع جوائز وكلاء KAIYI حول العالم، التقيت بأهم ثلاثة مسؤولين عن الشركة، السيد Hu Jun النائب الأول لرئيس KAIYI AUTO والسيد Jiang Sheng نائب رئيس KAIYI AUTO والسيد Han Ren رئيس KAIYI international

ومن خلال الحديث معاهم عن العلامة ومستقبلها، أقدر أقول ان اللي فات حاجة والجاي حاجة تانية خالص، نظام وخطط واستراتيجية واضحة واهتمام بكل تفصيلة صغيرة.. مش بس المنتج بيكون أهم حاجة، التنظيم مهم، الرؤية مهمة، الاستدامة أهم.

طب ايه علاقة مجموعة شيري بعلامة KAIYI❓

 مجموعة شيري أصلا ليها حوالي 18% من أسهم KAIYI ، وفي تعاون في استخدام التكنولوجيا والمحركات ونواقل الحركة المختلفة، بس بدم جديد قدر يدي علامة KAIYI لون مختلف عن باقي علامات مجموعة شيري.

الشركة قبل الإدارة الجديدة كانت بتنتج 60 ألف وحدة سنويا ، ومع خطة "55511" حيوصل الإنتاج لـ500 ألف وحدة سنويا نصهم مخصص للتصدير، وده خلال 5 سنين بس.

طب إزاي❓

الشركة حاليا عندها 4 موديلات، وخلال الخمس سنين حتضيف 5 موديلات تانية بنسخ كهربا وهايبريد وبنزين،فكرة المؤتمر ودعوة 200 موزع كانت عشان الكل يبقى عارف استراتيجية الشركة باعتبارهم شركاء، ويسمعوا منهم بشكل مباشر آراؤهم وملاحظاتهم لأن المنافسة بقت أعنف بكتير من الأول، وطلبوا من كل شخص حضر المؤتمر انه يختار أفضل تصميم للعربيات الخمسة سواء من الشكل الخارجي او الداخلي عشان يعرفوا يقيسوا ويختاروا الأفضل تصميما.

بالمناسبة.. بعد ما خلصت فعاليات المؤتمر والوفود سافرت ، اخدت الطيارة عشان اقضي يومين في شنغهاي، وصادفت انى قابلت السيد Jiang Sheng واحنا نازلين من الطيارة، ولمّا عرف اني لوحدي.. "قلب" الدنيا حرفيا وانه ازاي محدش معايا، ياسيدي يهديك يرضيك دي حاجة شخصية، رفض وقالي انت ضيفنا لغاية ما ترجع مصر.. حابب أوجه شكر خاص ليه على اهتمامه وضيافته..

Thanks Mr. Jiang Sheng 🌹