نيسان قشقاي الجديدة حتتقدم الاسبوع الجاي في مصر

نيسان قشقاي فيس ليفت وصلت مصر، وحيتم تقديمها الاسبوع الجاي مع اختبار قيادة "متعب" للصحفيين.

الجيل الثالث "الحالي" حقق مبيعات 350 ألف وحدة في أوروبا في 3 سنين ونص، ولمّا نيسان عملت تحديث الشكل من كام شهر، الاقبال عليها زاد.. طبعا مشاكل الاستيراد خلّت الفيس ليفت يوصل لنا متأخر حبتين تلاتة، بس المهم انه وصل.

طبعا العربية بتنزل بره بمحركات ICE وهايبريد و epower، بس اللي حتتقدم هي نسخة البنزين، طبعا الفيس ليفت كان عنيف جدا في مقدمة العربية، تقريبا اتغيرت كلها سواء الشبكة او الفوانيس ، وكمان وحسب التجهيزات العالمية بقت "متوحشة" جدا.

ايوة يابا الحاج.. يعني سعرها كام دي؟

لسة الشركة أصلا مأعلنتش عن وصولها ،وأكيد يعني السعر حيتم اعلانه مع التدشين الرسمي الاسبوع الجاي، لكن اعتقادي انك تزود 10% على سعر آخر دفعة وصلت مصر ، يعني ممكن نقول تبدأ في حدود مليون 550 الف جنيه.. طبعا حبايبنا التجار مش حيسكتوا، حتلاقي بتاع 150 ألف أوفر برايس.

طيب هو نيسان قشقاي مهمة أوي يعني؟

قشقاي كانت بسعر ممتاز، صحيح سعر التنفيذ ملوش علاقة بالسعر الرسمي، لكن حنقول ان السنتين اللي فاتوا كان في مشاكل وانتهت ، لو استمر التسعير بنفس المنوال ، وكمان لو العربية نفسها اتوفرت بكميات مناسبة ، أعتقد ان قرارات شرا كتير حتتحول ليها.

العربية بسعرها وتجهيزاتها من أفضل العربيات قيمة مقابل المال ، شياكة وأداء واعادة بيع، عربية انا شايف - الشكل الحالي- انها اختيار مناسب، طبعا الشكل الجديد –فيس ليفت- أحلى بكتير.

حاجة كمان أخيرة.. كتبت وغيري ان 2025 المنافسة فيها عنيفة جدا.. العلامة اللّي حتريّح حتفقد مبيعات كتير، ولو لاحظت ان الشركات الكبيرة بدأت "شغل" من أول اسبوع زي مجموعة غبور وللمنصور ونيسان.. والأخيرة لسة عندها كتير.. ومع التقديم الرسمي لقشقاي حيكون في مفاجآت تانية حيتم إعلانها في نفس الوقت.. خليها لبكرة نتكلم عليها..

السؤال المعتاد .. تفتكروا سعر قشقاي فيس ليفت كام؟