ممكن تشتري عربية صيني بـ3 مليون جنيه وانت طالع؟ و FBB وكيل هونشي في مصر

السؤال ده بقالي فترة بسأله لمسؤولي الشركات في مصر، وكان الرد ومازال انه صعب جدا ده يحصل، بالسعر ده انا ممكن اشتري "فواخر" أوروبي، ليه ادفعه في عربية صيني حتى لو بتقول بابا وماما؟

لو كنت سألت حد في مصر من 10 سنين هل ممكن نشوف علامة هافال في مصر ، كان الرد مستحيل، لأنه وقتها كانت أغلى من بقية العربيات الصيني بمراحل، ولكن أصبحت هافال منتشرة وبتبيع كويس في مصر.

السيد مدحت خليل رئيس شركة راية دخل قطاع السيارات بتوكيل اكسبنج اللّي تعتبر موديلاته حتى اللحظة أغلى سعرا ما بين الصيني في مصر،وعنده عربيتين معديين الـ3 مليون جنيه.

طب هل رجال الأعمال والشركات الكبرى وهي بتتعاقد مع توكيلات فاخرة مش عارفة ده؟ قولا واحدا عارفه كويس ومذاكرة كمان.

ناخد أمثلة.. شركة ناتكو ورئيس مجلس ادارتها السيد كريم سامي سعد ، أخد توكيل Exeed وقرر انه يتجمع محلي ويطرحه في السوق، بدون حتى ما يختبر رد فعل الناس بعربيتين استيراد، عنده ثقة انه يجيب عربية غالية ويجمعها ويبيعها.

شركة EIM ورئيس مجلس الادارة السيد خالد نصير أخد توكيل زيكر وفي موديلات سعرها60 الف دولار

المهندس نور الدين شريف شركته أخدت توكيل ROX السيد هشام عزالعرب أخد توكيل Link&CO ، ولسة Li auto و Nio ،ومش بعيد نسمع ان توكيل Aito جاي مصر وده توكيل سعر عربياته بتوصل لـ90 ألف دولار.

صحيح كل الشركات الفاخرة بيبقى "التارجت" بتاعهم عدد محدود ، لكنه بيزيد سنويا، وهنا ممكن أسأل.. هل نمط الاستهلاك بيتغير في الفئة A من العملاء؟

بالمناسبة.. توكيل هونشي حيتم تدشينه في الربع الأول من2025 ويتبع مجموعة FBB القابضة متعددة الجنسيات مقرها دبي، وهم وكلاء هونشي في مصر والاردن وليبيا، وحاليا بيتم تشكيل فريق العمل وتجهيز المقر في المرشدي بالقطامية..وأفخم عربياتهم كهربا اسمها EHS9 الفئة الأعلى فيها بتتباع في السعودية بـ463 ألف ريال