اسلام حويلة يكتب : ليه متمش الأعلان عن سعر بايك BJ30 بنزين وهايبريد؟

موضوعات كتير من المفترض اكتب عنها ، لكن خلينا نكمل كلام امس عن بايك BJ30 أحدث المنضمين لسوق السيارات المصري.

السؤال الأهم عن العربية كان عن سعرها وليه الوكيل ما أعلنش السعر؟

السؤال ده وجهته لأعلى 3 مناصب في الشركة ، السيد خالد نصير مالك المجموعة ، والسيد طاهر شاهين الرئيس التنفيذي والسيد احمد الخادم رئيس القطاع ، والإجابة كانت واحدة.. لسة في مفاوضات مع الشركة الصينية للحصول على سعر أفضل نقدر من خلاله نحقق أهدافنا من المبيعات.

طب ازاي تعمل حفل اطلاق وميتمش تسعير العربية؟

القصة كلها ان رئيس شركة بايك حصل عنده تغيير في المواعيد، وكانت مصر الدولة الثالثة في المنطقة في ترتيب اطلاق العربية بعد السعودية وقطر ، لكن وزي ما قلت حصل تغيير في المواعيد، ورئيس بايك قدّم زيارته لمصر وقرّر انها تبقى الدولة الأولى بعد الصين اللي يحصل فيها الاطلاق ، وبالفعل تم الاطلاق بسرعة وعلى غير الجدول الزمنى.

طب ايه السعر المتوقع ؟

مفيش اجابة محددة، كل ما قدرنا ناخد سعر أقل، كل ما العربية انتشرت أكتر، لكن السعر الحالي بعيد عن طموحاتنا، صحيح انها أول عربية هايبريد من الصين تنزل مصر ، وان المايلد هايبريد حاجة تانية خالص ، لكن برضه عايزين يبقى ميزة توفير البنزين الحقيقية يبقى معاها ميزة سعر عربية منافس.

اثناء الحفل التقيت بالسيد زوهو بينجفاي نائب المدير العام في شركة بايك الصينية وسألته عن حقيقة استهلاك الوقود ، وان دايما بيكون الفرق بين الاختبارات المعملية والواقع كبير، ألف كيلومتر في "التفويلة".. رد وقالي انهم عملوا اختبارات عملية على تراك في بكين وكان استهلاك الوقود اقتصادي للغاية ، وان نظام الهايبريد المتواجد في العربية هو أحدث ما توصلت اليه التكنولوجيا في هذا المجال.

بالمناسبة.. سألته ليه متأخرين في دخول أوروبا؟ قالي حتشوفنا في 2025 في السوق الأوروبي ، وفي الصورة السيد خالد نصير رئيس مجلس ادارة مجموعة شركات ألكان جروب