علامة Lynk & Co بقت مع عز العرب.. تعرف ايه عنها؟

الجماعة الصينيين عندهم شغف بالعلامات التجارية ، يعني لما تمسك شركة شركة حتلاقي ان أسهل حاجة عندهم اطلاق علامة جديدة ، يمكن نظرية "كل نفسك" مقتنعين بيها بزيادة شوية.

علامة Lynk & Co زي ما كلنا عارفين تتبع مجموعة جيلي ، العلامة تم اطلاقها وتأسيسها في جوتنبرج بالسويد معقل فولفو ، لكن تم تصنيعها في الصين ،بس الأمر الغريب والعجيب ان نشاة علامة زيكر بدأت من نموذج لـ Lynk & Co.

الحكاية انه في معرض بكين للسيارات في سبتمبر 2020 تم عرض كونسبت جديد باسم Lynk & Co Zero لكن وإذ فجأة "المعلم لي شوفو" يقرر تبقى علامة جديدة باسم زيكر والموديل يبقى 001، براحته طبعا الورق ورقنا والفلوس فلوسنا، ولغاية اللحظة محدش عارف ليه طلعت في دماغه وغير الاستراتيجية وبقت علامة زيكر بناء على كونسبتLynk & Co، ده غير ان اللوجو أو شعار العلامة تقريبا شبه شعار علامة زيكر.

علامة Lynk & Co عندها 6 موديلات هايبريد وموديل واحد كهربا لسة يا دوب تم الكشف عنه في سبتمبر الماضي ، من كل الموديلات دي عندها موديل واحد بس في اوروبا 01 واخد 5 نجوم في اختبارات السلامة الاوروبية ، واكبر سوق ليه في فرنسا ، لكن لسة المبيعات تعتبر ضئيلة جدا.

في عام 2023 باعت علامة Lynk & Co حوالي 220 ألف عربية ، منهم اكتر من 200 الف وحدة في السوق الصيني والباقي في اسواق اوروبا والعالم

العلامة تصنيفها فاخر صحيح أقل من زيكر بس برضه من "الفواخر" وعشان كده أسعارها تعتبر عالية نسبيا ، مثلا موديل 01 بيبدأ سعره في السعودية بـ103 ألف ريال وبدون الضريبة وبيوصل لـ111.5 ألف ريال وبرضه بدون الضريبة للفئة الأعلى.

بالمناسبة.. شركة عز العرب وكيل حصري لـ8 علامات حتى الآن والمفاوضات شغّالة مع علامة جديدة لتجميعها في مصنع الشركة بجانب بروتون