نيسان وزّع.. صني صدّر.. دولار اقبض.. فواخر استورد

أحد الأصدقاء من موزعي السيارات سألنى.. لو قدّامك فرصة تاخد موزع معتمد .. ح تختار أي علامة ؟

خلينا نتكلم عن اجابة السؤال ده وازاي التجار والموزعين بيفكروا الفترة دي في ظل الوضع القائم..

أهم شركة في تقديري هي نيسان مصر

نيسان تعتبر "الدجاجة التي تبيض ذهبا"، عشان كده شبكة التوزيع مقفولة بالضبة والمفتاح ،مش بس لكونها عربية بيّاعة يقدر الموزع انه يزود اوفر برايس ويبيعها لتجار تانيين، خالص، نيسان صني تحديدا بيتم تصديرها بشكل غير رسمي للعراق وليبيا وبعض الدول الأفريقية الأخرى وبأعداد كبيرة (آلاف السيارات)، ومعنى غير رسمي انه بيتم عن طريق الموزعين او التجار، مش عن طريق نيسان مصر نفسها، اللّي هي مملوكة لنيسان موتور اليابانية بالكامل ، صحيح نيسان بتصدّر للاسواق الأفريقية لكن عن طريق الوكلا بس وبقواعد محددة واجراءات رسمية.

لكن التصدير غير الرسمي انه موزع أو تاجر يصدّر العربيات لتاجر تاني خارج مصر، زي ما بيحصل عندنا بالظبط واللّي بنسميه استيراد رمادي.

طبعا انت بتصدّر عربية منشأ مصري ،وبتتحسب حصيلة تصديرية يقدر من خلالها الموزع أو التاجر انه يستورد عربيات بطريقة شرعية ورسمية ، وكمان ياخد كل الدعم من الدولة كونها تصدير منتجات مصرية، الموزع يصّدر للمنطقة الحرة ومن هناك شركات كتير تاخد العربيات دي وتبيعها لتجار في دول تانية ، الموزع ياخد حصيلة التصدير الدولارية ويبعت يستورد شوية عربيات "فواخر" بمكسب هايل.

يعني يبيع ويكسب ويستورد ويكسب ،وتقريبا صني هي العربية الوحيدة منشأ مصري اللّي بيتم تصديرها، هل ده ممكن يحصل مع عربيات تانية زي جيلي امجراند أو بروتون ساجا أو غيرها .. لسة حنشوف.

بس التصدير موجود بقاله سنين ؟

ده صحيح، بس كان أغلب التصدير طالع على دولة ليبيا ، ومش كل التجار والموزعين عندهم القدرة على كده ، في أسماء بعينها بس هي اللّي شغّالة تصدير لهناك، لكن مع دخول العراق زاد الطلب ،وبدأ التوجه للأسواق الأفريقية كمان ، خاصة ان نيسان صني سعرها رخيص فعلا بالدولار.