قدّم عربية اعتمادية وشيل نص الكماليات ونزلي سعرها.. بسيطة أهي

كنت عايز اكتب النهاردة عن العربية الجديدة اللّي حتنزل مصر في نوفمبر واللي تعتبر المنافس المباشر لجيتور T2 ، لكن قلت استنى شوية .. مش كله ورا بعضه ، خلينا نتكلم عن تقرير أكثر العربيات موثوقية واعتمادية واللي طلع من 5 ايام في السوق الأمريكي.

الرسم المرفق بيوضّح الترتيب ، كونه دقيق بنسبة 100% أو لأ مش موضوعنا بس الأكيد انه بيدينا مؤشرات حول الأكثر اعتمادية من العلامات المتواجدة في الولايات المتحدة.. وعشان كده مش حتلاقي علامة صيني خالص ، عشان لسة السوق هناك مستعصي دخوله عليهم سواء لسياسات الدولة نفسها من فرض ضرائب ورسوم مرتفعة، او طبيعة المستهلك الامريكي نفسه.

المهم لكزس زي ماهي من 30 سنة في المركز الأول وبعدها تويوتا ،وده أمر ممكن نقول عليه العادي من زمان ، لكن الملاحظ فعلا علامة المركز الثالث ..MINI ، عربية انجليزية تقدر تتخطى عمالقة اليابان في الاعتمادية ، وتتفوق على كل العلامات الاوروبية ده أمر جدير بالاحترام.

الاعتمادية عامل مهم جدا في قرار الشراء ، ومع التضخم العالمي بقت أهم عامل للمستهلك، عربية اعطالها قليلة جدا مقارنة بمنافسيها ، ده يتّرجم لتوفير كثير من المال والوقت اللّي ممكن تقضيه في اصلاح العربية سواء في مركز الخدمة او في الورش الخاصة.

ولو سحبنا التقرير على مبيعات السوق المصري المستوردة، حنلاقي ان تويوتا وضعها في مصر زي العالم مع اختلاف الموديلات ، لكن تبقى الاعتمادية هي السمة الغالبة على علامة تويوتا، ولو جينا للمركز الثاني والثالث في مصر حنلاقي علامة كيا وهيونداي بنفس الترتيب.

كنت اتكلمت في مقال سابق عن التشابه الكبير بين الموديلات الحديثة وان كلها تقريبا فيها نفس التجهيزات ، وان الشركات "بتعلّي" على بعض في الكماليات والابتكارات، وان ده كله مع الوقت حيبقى "فنكوش" حقيقي لانها ع الأرض منظر ع الفاضي ، يعني استخدامها يكاد يكون منعدم،

قطاع كبير جدا من العملاء عايز عربية شكلها شيك وفيها لمسات أنيقة وشيل منها نص الكماليات "المنظر" وقلّل السعر وتكون اعتمادية ما يتصرفش عليها كتير و مش عايزها توربو.