اسلام حويلة يكتب : بايك U5 Plus.. صحيح زادت بس لسة بتخسر

امس رفعت شركة ألكان أوتو أسعار موديلات بايك في مصر، والزيادة تراوحت بن 10 آلاف حتى 25 ألف جنيه، بايك زي ما كلنا عارفين يتقدم 3 موديلات حتى اللحظة، سيبك من الـ2 الـSUV مش موضوعنا خلينا في السيدان الـU5 Plus.

سعر العربية زاد 25 ألف جنيه، ودي غريبة جدا لأن أصلا سعر العربية المفروض يعدي المليون جنيه لأول فئة؟

طبعا انت مستغرب من كلامي ، وحتستغرب أكتر لو قلتلك ان الشركة بتخسر في كل عربية ، بتخسر فعليا، وده كلام الأرقام والأسعار اللي جاية بيها العربية (فاتورة المصنع).

طاه هو في حد عاقل يخسر في عربية المفترض انها تبيع كتير عشان في خطة لتجميعها في مصر؟

طبعا لأ ، بس انا وانت بنتكلم عن خسارة في منتج واحد، وارد جدا ان الخسارة تكون بتتعوض في منتجات تانية، وارد اكون انا وانت بنتكلم عن خسارة وقتية، وصاحب الشأن يكون عامل حساباته على 5 سنين مثلا واجمالا ميخسرش.

طيب تعالى نحسبها بالورقة والقلم ، لو افترضنا ان سعر أول فئة 8800 دولار -خد بالك بقول لو افترضنا – العربية عليها اجمالي رسوم وضرائب وجمارك 67% مع سعر دولار حوالي 49 يبقى سعر العربية FOB حوالي 720 ألف جنيه ، نضيف عليهم 2000 دولار شحن تكون العربية واقفة بـ818000 جنيه ، بدون احتساب مصروفات أخرى خالص، يعني سعر العربية من المصنع + اقل سعر شحن بس.. وسعر العربية بشكل رسمي بـ825 ألف جنيه..

طب ماهو العربية ممكن تكون بسعر أقل من كده مثلا؟

صحيح انا قلت نفترض سعر ، لكن الحقيقي مش أقل خالص؟

أيوة يعني انت عايز تقول ايه ؟

ولا حاجة انا قلت أفكر بصوت عالي لقيت نفسي بكتب.. بس كده

بالمناسبة.. قرار البنك المركزي بإرجاء تمويل استيراد سيارات تامة الصنع مش جديد ، ماهو أصلا عشان تستورد لازم يكون عندك حصيلة تصديرية