اسلام حويلة يكتب عن فيراري : احنا مش بـ"نكسب".. احنا بـ"نغرف"

من حوالي 48 ساعة تم الكشف عن فيراري بوروسانجوي وفيراري روما سبايدر في مصر، سيبك من ازاي وفين لأن الناس بتزعل، بس بالمناسبة دي قلت نتكلم شوية عن فيراري بس من زاوية تانية.

بين علامات سوبر كتير تفضل فيراري هي فيراري ، تاريخ عظيم وأرباح اعظم بكتير،وهو ده الموضوع بتاعنا النهاردة.. الأرباح.

في سنة 2023، باعت فيراري ولا بلاش باعت لان الموضوع مختلف شوية ، فيراري "سلّمت" 13,663 وحدة بإجمالي مبيعات حوالي 6 مليار يورو، وده رقم في عرف الشركات الكبيرة متواضع جدا، لن مثلا علامة بورشة "سلّمت" برضه 320,221 وحدة باجمالي مبيعات حوالي 40.5 مليار يورو.. انا بس باعمل مقارنة في حجم وقيمة المبيعات بين علامتين.

المهم انك تعرفه ان فيراري هي الشركة الأولى في الأرباح بين شركات سيارات العالم كله، ووصل مكسبها في 2023 الى 27%.

يعني حضرتك شوف العربية بتتباع بكام وطلع منها مكسب 27% صافي ، خد بالك ده مكسب الشركة الأم لوحدها.

وعشان اقربلك المسألة أكتر حبتين كل يورو مبيعات فيراري احتفظت بـ27 سنت ليها مكسب.

انت متخيل 27% صافي ربح ، يعني مساهمين فيراري كسبوا السنة اللي فاتت 1.6 مليار يورو.. بمتوسط مكسب في العربية الواحدة 130 ألف دولار.. متستغربش.. فيراري بوروسانجوي مثلا بيبدأ سعرها بـ400 ألف وبتوصل لـ675 ألف دولار.

وعشان تعرف "جحود" فيراري لازم تعرف ان علامة بورشة واللي بتيجي في المركز الثاني في صافي الأرباح بتكسب 18% بس.. "غلابة" العلامات التانية برضه.

يعني علامة بورشة حققت صافي أرباح حوالي 7.3 مليار يورو يعني متوسط ربح العربية الواحدة حوالي 25 ألف دولار.

طبعا سيادتك عايز تعرف باقي العلامات ، مفيش مساحة بس ممكن أقولك ان أقل علامتين ربحية وكمان متواجدين في مصر هما رينو ونيسان.

علامة رينو صافي ربحها 4.7% من كل وحدة وعلامة نيسان صافي ربحها 4.6%.