اسلام حويلة يكتب : سوق المستعمل في "النار"

يوم الجمعة كانت درجة الحرارة المعلنة 42 طبعا ده في الضل، لكن لو انت واقف الساعة 2 الظهر في الشمس حتحس بيها 50 ع الأقل، وده كان الأمر العجيب في سوق السيارات المستعملة، كمية كبيرة من الأفراد عارضين عربياتهم للبيع، لا تتناسب أبدا مع درجة الحرارة العالية.

طب هل ده عادي وطبيعي؟

أصل محدش عاقل يروح يوقف 5 او 6 ساعات في "النار" وميكنش جاد في البيع، وكمان هو مش رايح يبيع عربيته عشان يطلع يقعد يومين في الساحل، لأ هو مستعجل ع البيع وكمان مستعجل انه يشتري عربية تانية سواء مستعملة أو جديدة.

في رأيي ان ده يمكن يكون أهم مؤشر للفترة الجاية في سوق السيارات بشكل عام، اللّي ح يبيع عربيته مؤكد ح يشتري غيرها،خلينا نقول ان النص ح يشتري مستعمل والنص التاني جديد ،ولو تابعنا حركة الموزعين والتجار حنلاقي ان حركة البيع بدأت تشتغل، خاصة مع توقف نافذة الـACID الجمركية لـ"التحديث" من شهر تقريبا "مشيها تحديث"، وده ح يودّينا للمربع رقم صفر من تاني "الاوفر برايس".

الفكرة ان المستهلك في مصر "اتعود" انه يندفع ويجري يشتري أول ما الأسعار تبدأ تزيد، وده يخلي معدل زيادة الأسعار سريع، وكل ما تزيد الأسعار، عدد المشترين يزيد، دي العربيات كانت "مرميه" قدّامك بسعر أرخص بكتير، لكن "مايحلاش الشرا الا ع الغالي" واللّي سعره بيرفع بسرعة .. عادتنا ولا حنشتريها.

أيوة يعني أسعار السيارات ح تزيد ولا ح تنزل؟

حاليا عند التجار والموزعين في عربيات عليها اوفربرايس وفي عربيات تانية في نفس المعرض عليها "حرق"، عرض وطلب، تاجر عنده مخزون من موديل معين مش ماشي، ح يحرق سعره عشان يخلص منه ، وعنده عدد قليل من موديل عليه طلب، يبقى ح يبيع بـ"أوفر" و"دي بتشيل دي".