تجميع هيونداي النترا AD وكمان الفيس ليفت.. مش كيميا يعني

في سنة 2015 ظهر الجيل السادس من هيونداي النترا، واللي بقت متوفرة في 2016 في دول العالم، كان التغيير في التصميم عنيف ، يعني ممكن تقارن بين الجيل الخامس النترا HD والجيل السادس AD حتلاقي اختلاف كبير في كل التفاصيل.

بكرة مجموعة غبور حتعلن عن طرح النترا AD تجميع محلي(CKD) رسميا في السوق المصري، لكن عشان نكون أكثر دقة ،الموديل اللي حيظهر للعلن الصبح هو الفيس ليفت لـAD اللي اتعمل سنة 2019.

النترا AD فيس ليفت (2019) وحسب مؤسسة جي دي باور أخدت 86 من 100 في الاعتمادية والموثوقية وده مقياس لمستوى العيوب والأعطال والعيوب التصميمية اللي عاني منها أصحاب العربيات من المحرك إلى نظام المعلومات والترفيه.

بس هل العربية حتعمل شغل كويس؟

قولا واحدا آه طبعا

اصل هي مش كيميا ،الشطارة في اللي يقدر يجمّع عربية تلعب في حتة لوحدها، عربية شيك، سعرها منافس، متوفرة للاستلام، وقطع غيار في كل مكان ،وضمان من وكيل معروف عنده تجارب سابقة.

سهلة أهي

طبعا الكل مستني السعر، ومجموعة غبور حتعلنه بكرة، لكن ممكن نستنتج متوسط اسعار الفئات الثلاثة لـ AD، يعني مثلا سعر الفئة الأعلى لـ"النترا HD" كان في شهر ديسمبر 890 الف جنيه ،وتقريبا كان وقتها الدولار بنفس سعره الحالي، وسعر أقل فئة من "النترا CN7" هو مليون و 350 الف جنيه ، يعني الأسعار غالبا حتكون ما بين  950 الف الى مليون 250 الف جنيه.

بالمناسبة ..اسعار AD المستعملة على الانترنت،موديل 2019 متوسط المطلوب 840 الف جنيه، وفي حد عارض موديل 2020 على مليون و50 الف جنيه،طبعا التجار تقريبا بيشكلوا اكتر من 90% من اعلانات المستعمل.

اقرأ ايضا للكاتب اسلام حويلة :

يعني الدولار ينزل بس على العربيات وأسعار قطع الغيار بنت البطة السودا؟!