الفجوة التمويلية وشرا العربيات.. انت سيد قرارك

فكرة التهليل لنزول أسعار العربيات وظهور شوية "مواطنين" على السوشيال ميديا والترويج ان في مزيد من الانخفاض في الاسعار ودعوة الجميع بالامتناع عن الشراء انتظارا للتخفيضات بقى أمر سخيف جدا "وبايخ"، والأسخف منه انك ك "مواطن" تسمع وتنفذ بدون أي محاولة لتشغيل "الدماغ"

قبل أي حاجة مش دوري ولا دور أي حد انه ياخد قرار نيابة عنك، يعني مينفعش اقولك اشتري او متشتريش ، الطبيعي اني اقول وجهة نظري في مسألة ما وفق معطيات محددة وتوقعات مؤسسات معنية، و"سيادتك" تفكر وتسمع وتقرأ لناس تانية وبناء عليه تاخد قرارك.

صندوق النقد في بيان قال ان الفجوة التمويلية لمصر من النقد الأجنبي بعد تدفقات رأس الحكمة وبرنامج الصندوق 28.5 مليار دولار.. وده معناه ان الأزمة لسة موجودة وبنعيشها، يمكن أقل حدة من قبل، لكنها موجودة ومخلصتش.

طب تعالى نشوف انعكاس ده على سوق السيارات

أولا، لو انت متخيل ان الدولة مهتمة أو حتى ناوية تفتح الاستيراد للعربيات المستوردة يبقى انت عايش في كوكب تاني.. الدولة عندها التزامات أهم بكتير جدا وأولويات للشعب مفهمش اصلا العربيات.

بس من ضمن الأولويات فعلا مكونات الانتاج.. لكنها برضه من من اهم الأولويات، يعني لا قدر الله وحصل أزمة حتقف عادي زي ما وقفت قبل كده ومكنش في اصلا قطع غيار ولا مكونات والمصانع وقفت.

ثانيا ،انخفاض الأسعار مرتبط بانخفاض الدولار ..هل ما سمعته أو قرأته اليوم يديك مؤشر ان سعر الدولار في طريقه للانخفاض.. ماهو يا آه ح ينخفض يبقى ترجع على طول لـ"أولا" وتحسب حسبتك، يا إما لأ مش ح ينخفض ، وطالما مش انت جزمت انه مش ح ينخفض يبقى احتمالات ارتفاعه مساوية لاحتمالات ثباته، وبرضه تحسب حسبتك.

بالمناسبة.. توكيل "لامبورجيني" حيتقدم قريبا في مصر ترتيبات التقديم وتدشين العلامة تفاصيلها كتير جدا ولو الأمور مشيت حسب الخطة حتتقدم في الربع الثالث.