استثمارات المنصور وتقديم أوبل كورسا.. الدكة في انتظار الموزعين

احداث كتير ورا بعض حصلت خلال اليومين اللي فاتوا، طرح BMW X2 وبعدين اعلان مجموعة عز العرب حصولها على وكالة سمارت للسيارات الكهربائية، تدشين مازيراتي جراند توريزمو في مصر، المنصور للسيارات قدمت اوبل كورسا فيس ليفت ، الاعلان عن وكيل جديد لعلامة لادا في مصر، كل ده ومعرض بكين رجع بعد غياب سنين.

يعني اسبوع مليان "دسم" بس اهم حدث كان اجتماع رئيس الوزراء مع قيادات شركة المنصور للسيارات ، وليه بقول عليه الأهم؟

لأن اي استثمارات بيتم ضخها (20 مليون دولار) لازم تقابل بترحيب وحفاوة كبيرة جدا، لان ده معناه توفير فرص عمل جديدة مباشرة وغير مباشرة (5000 فرصة عمل ) والأرقام المذكورة دي لموديل واحد من MG ، ده غير موديلين شيفروليه.

في اكثر من مناقشة مع موزعين كبار في السوق على مدار 2023، كان الحديث الدائم عن ان المستقبل مع العربيات المحلية، يعني كـ موزع حاول "ترشق" في شبكة موزعين رسمية لعلامة عندها تجميع محلي، ع الأقل حتضمن حد ادنى من العربيات كل شهر لو حصل في الأمور أمور.

والتجميع المحلي بدأ يرتقي بمستواه، يعني مبقاش مقتصر على موديلات عفا عليها الزمن- سيبك من BYD F3- الكلام بقى على موديلات حديثة، كمان مع حوكمة الاستيراد وندرته الموزعين حيلاقوا نفسهم بيخرجوا من السوق، ماهو الوكيل مش حيطلع عربياته للموزعين ويسيب معارضه فاضية، الا لو كان شغال بفلوس الموزعين ودي مسألة بتقل مع وقف الاستيراد، وحتى فكرة الكوتة بتاعة الموزعين برضه بتقل واحدة واحدة.

يعني يا تبقى وكيل، يا تشتغل صيانة ، يا تشّغل الوكيل بفلوسك، غير كده حتقعد ع الدكة.

بالمناسبة .. اوبل كورسا حققت مبيعات تزيد عن 14 مليون وحدة على مدار 42 سنة، ودي الفيس ليفت للجيل السادس كورسا F ،الي اتقدمت في مصر بفئة وحيدة بسعر 1.3 مليون جنيه.