سعر العربيات نزل بس سعر الفائدة بقى نار يا حبيبي نار

كلنا مستنيين أسعار العربيات تنزل ، والسؤال الدائم حتنزل امتى؟ بس هل الاسعار حتنزل فعلا؟

أكيد زيّي زيك زي أي حد محتاج شوية وقت عشان يظبط نفسه على رمضان ، يعني مواعيد النوم، الاعتياد ع الصيام ، مواعيد أكل جديدة ، قهوة ،شاي ، نيكوتين وغيره.
أهو زي ما أنت محتاج كام يوم ،برضه شركات العربيات محتاجة كام يوم تظبط نفسها على سعر الدولار الجديد ، تشوف في اعتمادات من البنوك ولا لأ؟ طب لو اشتغلوا زي الأول حيبقى السعر على كام؟ يعني محتاجين يعيدوا الحسابات من الأول ، وبدخول رمضان المسألة بقت أسهل عليهم، لانه العرف بيقول ان الشهر الكريم مبيعاته ضعيفة، وشرا وبيع العربيات فيه بيبقى "ميت اكلينكيا".
بشاير نزول الاسعار بدأت سواء من مجموعة IFG وعربياتها ساوايست و VGV أو من شركة عربيات ايجيبت وكلاء KGM – سانج يونج سابقا- وأعتقد ان كل الشركات حتنزل بالأسعار لو فضل الدولار مستقر ومتاح.
بس المشكلة اللي حتواجه السوق هي سعر الفايدة العالي جدا ، أكثرية مبيعات عربيات الركوب بتكون بالتقسيط من البنوك او شركات التمويل ، ومع وصول الفايدة لـ28% وأكتر في السنة ، بقى الموضوع صعب جدا على العميل ، وبقت مقامرة فعلا شراء سيارة بالتقسيط.
يعني العميل مش عارف يفرح بانخفاض أسعار العربيات ولا يزعل من ارتفاع أسعار الفايدة؟
وده ممكن يكون سبب في عدم انخفاض الاسعار ، لأن الشركة اللي كانت بتبيع 1000 عربية بقت بتبيع 100 وبيتم تحميل كل التكاليف عليهم ، الخوف لا يبقوا 50 عربية وبرضه التكاليف حتتحمل عليهم.
بالمناسبة.. سعر الدولار النهاردة نزل عن امس ،وتحويلات المصريين في الخارج رجعت لمعدلاتها الطبيعية بحسب وزير المالية، والتدفق الدولاري شغّال.. طبعا كلنا بنقول يا رب اللي بالي بالك ميحصلش تاني