اسعار العربيات سنتين ورا "ولّت وانتهت ومش حترجع"

أي كلام على أسعار أو تسعير للعربيات هو نوع من العبث، واي محاولة لمناقشة اللي بيحصل هو هزل بمعنى الكلمة.
لازم نعتاد على الوضع الجديد اللي بقينا فيه، وان اسعار العربيات سنتين ورا "ولّت وانتهت ومش حترجع".. انت قاعد بتحسب كانت بكام وبقت بكام، وسيادتك عمّال تضرب كف على كف ، ِسبت سعادتك كل حاجة حواليك سعرها راح في الوبا ومسكت في العربيات، عشان ترتاح احسبها بالدولار ، وزوّد عليها حبة حلوين من شحن وتضخم محلي وعالمي ، حتلاقيها هي هي ، بس انت اللّي ما صدقت يا سيد.
طب هو في ناس بتشتري يابا الحاج؟
أيوة طبعا، في قطاع كويس سواء من العاملين بالخارج أو من اللي بيتعاملوا مع شركات عالمية ودخلهم بعملات أجنبية دولار ويورو وغيره.
في قطاع أكبر احتاط للتضخم ، وحافظ على قيمة فلوسه سواء في دهب او عملات او غيره ، فده برضه حيقدر يشتري.
في قطاع تالت صحيح هو أقل في العدد بكتير بس تقدر تقول انه متاثرش كتير، مش لإنه عايش بره مصر ، ده لإن عنده استثمارات جوه مصر وخارجها.
خلينا في السوق
بكرة حيتم تقديم 3 عربيات لأول مرة في السوق المصري ، مجموعة ابوغالي حتقدم سوبارو فورستر وسوبارو كروستريك ، من اليابان محركاتهم فوق الـ1600 سي سي يعني جمارك كبيرة ورغم ده الأسعار المتداولة تعتبر منافسة لعربيات أقل من 1600 سي سي.
العربية الثالثة دي حدوتة لوحدها ، اتكلمت عنها قبل كده ، لوتس إلتير الـSUV الخارقة الكهربائية ، من صفر لـ100 كم في 2.9 ثانية وسرعة 260 كم في الساعة ، مسافة 595 كم في الشحنة ، محركين بقوة900 حصان.
بالمناسبة.. خطة مصر استهداف نمو 4.2% للسنة المالية 2024-2025 وده أقل من توقعات صندوق النقد الدولي 4.7% لنفس السنة.. حتعدي وحتبقى أحلى