يحدث في السوق الموزعين والوكلاء" وقعُوا" في بعض والعربيات بخصم على السعر الرسمي

👈كل الاسماء الكبيرة والمعروفة عندهم غضب مكتوم من وكلاء كتير بسبب دخول عدد كبير من التجّار لأول مرة في شبكات التوزيع الرسمية.

📌الغضب مش من فكرة دخول "جدد" التوزيعات، لكن من ممارسات بتحصل في السوق وأثرت على شغلهم.

👈الموزع الرسمي لعلامة ، معناه انه شريك ، لانه بيساهم في انجاح أي علامة ودي حقيقة.

👈لكن في تجّار جدد دخلوا "كار" التوزيع ، ومع أول شحنات استلموها (كميات كبيرة) بدأوا يوزعوها على تجّار بخصم كبير، يعني سعر العربية مليون جنيه ، فيعرضها على تاجر (مش موزع) بسعر أقل كتير من سعرها الرسمي، وبالتالي التاجر اللي اشترى العربية عشان يكسب ويبيع ، يقوم منزل سعرها عن الرسمي، بغض النظر العربية دي شغّالة وبيّاعة ولا لأ.

👈الموزع "حديث العهد" بيعمل ده عشان يلم "كاش" بسرعة بحيث يعرف "يدوره" تاني ، لأنه مش "حمل" ركن الفلوس شهرين تلاتة، بعكس الموزع القديم، عارف ان ده من أصول الشغلانة، عربيات بتركن فترة مقابلها عربيات بتمشي بسرعة.

👈الوكيل نوعين، نوع لمّا بيسمع بكده، بياخد اجراءات فورا، لأن العلامة في النهاية مسؤوليته، ومينفعش عربياته تبقى "بيدلّل" عليها وتتباع بخصم ، والوكيل ده غالبا مبيعاته كتير.

👈النوع تاني يقولك طالما العربيات خرجت من عندي و"قبضت" ثمنها ، ياكش الدنيا تولع، وطول ما الموزعين بياخدوا حصصهم يبقى "اتعشت".

👈الجدد شعارهم "التجارة شطارة" ،هو يعني لازم اكسب كتير ، بدل ما اكسب لوحدي يكسب معايا تاجر تاني ، ولا هو لازم امشي على "نهج" السابقين في التوزيع عشان ابقى حلو وكويس.

👈العميل برضه نوعين، نوع لمّا يسمع ان عربية بتتباع بأقل من سعرها الرسمي، بيخاف ويستنى السعر ينزل اكتر، النوع التاني بيلاقيها فرصة ويروح يشتريها.

👈بس هو الموزع القديم لمّا العربيات بتركن عنده..مش بيعمل عليها خصم برضه❓ولا الغضب جه على العربيات اللي بيكسب منها❓

📌بالمناسبة.. مفيش عربيات عليها أوفربرايس إلا 5 أو 6 موديلات بالعدد وبأوفر بسيط، الباقي يا بالسعر الرسمي يا بالخصم