هو استهلاك الوقود عامل مهم لمّا تشتري عربية جديدة؟ ليه فاكرني استرالي!!

تقدر تقول ان من ساعة أزمة مجموعة فولكسفاجن في 2015 الخاصة بالانبعاثات، والدول الأوروبية والولايات المتحدة بتتعامل بحذر شديد مع المسألة ، وان الانبعاثات دايما بيصاحبها استهلاك الوقود.

وبعدها تم انشاء برنامج الاختبارات في العالم الحقيقي بتكلفة 14 مليون دولار ومدته 4 سنين وبتديره جمعية السيارات الأمريكية وبتموله الكومنولث.

جمعية السيارات الاسترالية عضو البرنامج قالت انها عملت اختبارات وتحليلات لعدد من المركبات ظهر فيها أن ملصقات استهلاك الوقود مضللة لا تعكس ظروف القيادة في العالم الحقيقي ، وان ده بيكلف المواطن الاسترالي اللّي اشترى عربية جديدة أكثر من 600 دولار سنويا وقود إضافي.

وبعد مرور سنة على برنامج الاختبارات الأول من نوعه في العالم، وجدت AAA أن بعض العربيات اللّي تم اختبارها استهلكت ما يصل إلى 31 % من الوقود في ظروف العالم الحقيقي أكثر من الاختبارات المعملية.

طب مالنا واحنا واستراليا والعالم دي يابا الحاج؟

كنت متخيل ان مع ارتفاع اسعار البنزين في مصر يكون استهلاك الوقود عامل مهم في الاختيار ، لكن مع دردشة مع أحد أهم مسوقي السيارات في مصر، قالي ان توقعاتك مش دقيقة، أغلب الناس في مصر لا بيسألوا ولا بيهتموا أصلا بمسألة استهلاك الوقود.

احنا مش اوروبا ، الناس هنا عايزة عربية كاملة التجهيز وفيها فتحة سقف، مع انه مش حيستخدمها بعد الشرا بساعتين لغاية ما يبيعها، أهم حاجة للعميل ان العربية تحتفظ بقيمتها، ولما يبيعها تجيب قيمتها، وده بيحصل لمّا تكون بفتحة قف يعني الفئة الأعلى تجهيزا.

كنت متخيل ان 600 دولار (30 ألف جنيه) كل سنة، رقم مهم لو تم أخذ استهلاك العربيو للوقود في الاعتبار ، يعني 150 ألف خلال 5 سنوات متوسط عمر العربية عند المالك الاول.

مش عارف رأيكم ايه في المسألة دي ؟

هل فعلا معدل استهلاك الوقود مش بيفرق معاكم عند شراء عربية جديدة؟

بالمناسبة.. جيتور T2 حيتم تقديمها رسميا 4 نوفمبر وأتوقع ان سعرها حيكون 1.9 مليون جنيه .. والله أعلم