تراخيص سبتمبر وتويوتا اوربان كروزر .. محاولة للفهم

سهل جدا انك تفتح فيسبوك وتقول كما تشاء ، بس صعب جدا انك تتكلم بمنطق وبأرقام موثقة ، انك تتسق مع الواقع وتدعم رؤيتك بالأرقام على الأرض.

تويوتا اوربان كروزر تم الكشف عنها بالأمس، البعض وصفها بالضعف عشان همّا شايفين ان الموتور والفتيس مش بدرجة من القوة الكافية من وجهة نظرهم.. 103 حصان وعزم 138 نيوتن.متر.

تعالوا مع بعض نشوف تقرير تراخيص السيارات لشهر سبتمبر والصادر عن المجمعة المصرية للتأمين ، ونحاول نفهم اللي بيحصل.

تويوتا كورولا في المركز الأول بـ602 وحدة وبعدها BYD بـ570 وحدة ، كيا سبورتاج الثالث بـ529 وحدة، هيونداي النترا AD الرابع بـ514 وحدة والمركز الخامس MG ZS بـ484 وحدة.

باستثناء سبورتاج بقية العربيات المذكورة محركها تفس طبيعي بدون توربو وبنواقل حركةعادية، اقواهم النترا بـ127 حصان وعزم 155 نيوتن.متر.

يعني تقريبا 80% من المبيعات جاية من محركات ونواقل حركة عادية، ولو أضفنا للقائمة شوية العربيات البيّاعة زي نيسان صني وسينترا وفيات تيبو وجيلي GX3 pro وهيونداي أكسنت ، ده متسوبيشي اكسباندر 7 مقاعد و103 حصان وشغّالة بيع الله ينوّر ، يعني احنا بنتكلم على أغلبية ساحقة من المبيعات في مصر كلها بتنزل محركات عادية.

فإيه المنطق ان اوربان كروزر ضعيفة ومش قوية وبتاع؟

سوزوكي كل موديلاتها مفيهاش توربو ، وطول عمرها بتقول انا بقدّم عربيات اقتصادية واعتمادية ، اوربان كروزر بتتقدم لفئة معينة عندها الاعتمادية أولوية، وتكاليف التشغيل أولوية ، أما المهتمين بالأداء الرياضي ففي اكتر من 100 موديل ممكن يختاروا بينهم سواء تويوتا أو غيرها.

خد بالك ان الوكلاء في السوق المصري اتجاهم تقديم عربيات اعتمادية اقتصادية ، نيسان مثلا حتجمّع ماجنايت سواء بمحرك قوة 71 حصان او بالمحرك الحديث 98 حصان.. بروتون نازلة بموديل ساجا تجميع محلي بـ94 حصان وغيره.

بالمناسبة.. الـACID اتفتح للوكلاء بشروط معينة منها انك ترفق أرقام شاسيهات العربيات المصنعة لصالحك من الشركة الام..