توكيل صيني جديد نازل.. كله عايز تجميع محلي .. و بكرة تقديم شيري EQ7

في الصين شركات السيارات زي الرز ، التوكيلات على قفا من يشيل، لكن الشركات الحكومية بتبقى ليها استقرار وثبات وتاريخ، غير الشركات الخاصة ،غالبا بتعلن افلاسها، مش بيكمل غير برضه اللي ليهم تاريخ زي جيلي و BYD كده.

ففكرة ان توكيل صيني جديد نازل مبقتش مهمة ،إلا لو كان الوكيل المصري اسم كبير في السوق وليه تاريخ معروف وعنده توكيلات متنوعة سواء عربيات ركوب او اوتوبيسات وشوية محركات تانية..

الوكالة الجديدة منتهية تماما، المسألة بس في الوقت وانهاء الاجراءات ، والهدف منها التجميع المحلي وبسرعة، ويبدو ان ما يحدث في السوق والمنتظر حدوثه خلّى شركات السيارات تحاول تلحق تتواجد في التجميع عشان الفترة القادمة لسوق السيارات في مصر.

الوكيل الجديد كالعادة تكتم شديد جدا في الحصول على الوكالة، وناس كتير حتستغرب وقت الاعلان عنها ، لأن الوكيل الحالي بالفعل يمتلك توكيل صيني "طازة" بالإضافة لتوكيل اوروبي وآخر اسيوي.

وده خبر يخيلنا نتأكد ان مستقبل السوق حيكون أغلبه تجميع والقليل منه استيراد، وان مشكلة الاستيراد مش حتكون مسألة وقت وتنتهي.

وبعيدا عن الوكالة الجديدة ، شركة أبوغالي موتورز جددت شراكتها مع جيلي أوتو الصنية كوكيل في مصر.. ألف مبروك لابوغالي موتورز.

بالمناسبة.. غدا شيري EQ7 الكهربائية حتتقدم بشكل رسمي في مصر في فئة وحيدة، مدى 512 كيلومتر عملي وكويس، لكن دايما يظل السعر عامل أساسي في المعادلة.. لان تسعير العربية دي حيتوقف عليه حاجات كتير في السوق.