اسلام حويلة يكتب : الوكلاء والموزعين.. في المكسب "أخويا وحبيبي وكفاءة"

الموزع عايز ايه من الوكيل؟

عايز يكسب طبعا ،يستلم حصته المتفق عليها(مش المغصوب عليها)،في عربيات في سوقنا "بريمو"..بتكون محجوزة قبل ما توصل للموزع والوكيل عارف ده كويس، فمع العربيات "البريمو" ياخد شوية عربيات "تقيلة" هو "باكدج" على بعضه، انا كـ وكيل مفروض عليا العربيات دي من الشركة الأم او من المصنع، وبالتالي ح افرضها ع الموزع، يزعل يتضايق ،يا ياخدها يا مفيش عربيات.
الموزع بخبرته بيعرف يتصرّف حتى لو بخسارة ، بيدخل دي في دي وفي النهاية بيطلع كسبان

طب في حالة مفيش عربيات او عدد قليل جدا زي حالة السوق السنتين اللي فاتوا؟

البيزنس مفهوش معلش ، يعني مفيش موزع مشتغلش استيراد شخصي، مرسيدس ماشية نطلع المانيا نجيب شوية ، لاندروفر شغّالة يبقى نستورد ، وهكذا، أي عربية كان عليها طلب والوكيل مش عارف يوفّرها ، يبقى مفيش مانع ، المكسب ميقولش لأ.
في موزعين معتمدين جابوا عربيات من نفس العلامة بس عن طريق شركاء تانيين ، ماهو الولاء للعلامة مش حيدفعلي الالتزامات اللي عليا.
في حالة انخفاض الأسعار، الطبيعي ان الوكيل يعوّض الموزعين، لكن بعض الوكلاء قالت لا تعويض ولا يحزنون، ما انت كنت "بتشبح" العملاء بأوفر برايس وتضربه في جيبك، ميجراش حاجة يعني لمّا تيجي على نفسك شوية.

خدها قاعدة.. الموزع بيحسبها دفع كام وكسب كام، معاك بضاعة "تكسبني" تبقى "أخويا وحبيبي وكفاءة" ، اما فلوس تتجمد في عربيات تتركن بالاسابيع ..ولا أعرفك.

قاعدة تانية.. مفيش موزع حيقولك السوق 100 100، حتلاقيه دايما بيشتكي من سوء السوق، عمره ما حيقولك ان فترة الاوفر برايس كسب مكاسب 5 سنين قدام، عادي جدا انه يحلفك انه خسران مثلا ييجي 50 مليون جنيه، بس عمره ما حيقولك انه كسبان 100 مليون قبلها.

بالمناسبة.. في عربيات لو الحظ خدمها شوية "حتركن" نص عربيات السوق "البريمو"، ومنهم جي ايه سي امكو .. شكل وأداء وجودة