اسلام حويلة يكتب :

هي The New BMW X2 بس تقدر تقول عليها ميني X6

The New BMW X2

جلوبال اوتو وكيل BMW وميني فاجأتنا النهاردة بالاعلان عن سعر الجيل الجديد من X2 وتواجدها في صالات العرض، وكالعادة تم طرح X2 بنسخة Ice (محرك احتراق داخلي) ونسخة BEV (كهربائية).

الـBMW X2 هي أول عربية تقدم مفهوم الـSAC "Sports Activity Coupe" والفرق بينها وبين الـSAV "Sports Activity Vehicle" في التصميم ، لأن فكرة SAC انك تقدم عربية SUV بتصميم كوبيه وسقف مائل وأداء أكثر رياضية.

يعني الـX line من BMW فيه 7 عربيات.. منهم 3 SAC اللي همّا X2و X4 و X6 والـ4 الباقيين SAV اللي همّا X1و X3 و X5 و X7.

خلينا في حدث اليوم.. The New BMW X2

هي اصغر عضو في عيلة الـX وده الجيل التاني اللّي ظهر لأول مرة رسميا في معرض التنقل بطوكيو اكتوبر 2023 في اليابان ، والجيل الأول ظهر في معرض باريس 2016 كنموذج أولى (Concept) قبل ما يتم انتاجه تجاريا في 2018 تحت الاسم الكودي F39.

بيتم انتاج X2 في مصنع ريغنسبورج في ميونخ، وبسببها تم تزويد وردية ليلية اضافية عشان يقدروا يغطوا الطلب عليها.

الجيل الجديد من X2 عملاء كتير بيطلقوا عليه ميني X6 بسبب ان العربية بقت أكبر في الحجم وتم اضافة تجهيزات كتير ليها من الفئات الأعلى زي نظام تشغيل BMW 9 الأحدث في المجموعة وغيره كتير.

في BMW في برنامج BMW Individual وده عبارة عن مجموعة حصرية من الميزات الفردية اللي تقدمها BMW M عشان عربيتك يبقى ليها الكاريزما الخاصة بيها ، تقدر تختار منها 3 الوان حصرية، ده غير 7 ألوان أهمهم في رأيي الـRed fire.

بالمناسبة ..جلوبال اوتو بتقدم The New BMW X2 في 3 نسخ الأولى بمحرك 1.5 لتر، بسعر 3.2 مليون جنيه ، والثـانية من حزمة M الرياضية ومحرك 2 لتر ، بسعر 4.6 مليون جنيه ، ان الثالثة فهي نسخة الكهرباء بسعر 3.6 مليون جنيه.