رسميًا.. أطلاق إكسيد ET5 في السوق الصينية

أعلنت شركة إكسيد التابعة لشيري عن طرح سيارتها الجديدة ET5 في الصين واللي بتيجي ضمن فئة السيارات الرياضية متعددة الاستخدامات المتوسطة وبتستهدف فئة كبيرة من العائلات الشابة اللي بتدور على سيارة شكلها عصري وبمدى كبير وسعر مناسب وبتحاول الشركة من خلال الموديل ده تقدم معادلة تجمع بين التكنولوجيا الحديثة والسعر الاقتصادي علشان تقدر تنافس في سوق مليان اختيارات

مواصفات المحرك ونظام المدى الممدد

السيارة بتعتمد على نظام المدى الممتد اللي بيشتغل بفكرة بسيطة وهي إن المحرك البنزين مش دوره يحرك العجلات لكن يشحن البطارية لما تقل طاقتها وده بيخلي استهلاك الوقود أقل والمدى أكبر والمحرك المستخدم 1.5 لتر بقوة 156 حصان اما الدفع الفعلي فهو من محرك كهربائي خلفي بقوة 265 حصان وده بيخلي ET5 قادرة تحقق تسارع من الثبات الي 100 كم/س في 7.6 ثانية وده رقم كويس جدا بالنسبة لفئتها خصوصا انها سيارة عائلية في الأساس

البطارية ومدى القيادة الكبير

تستخدم السيارة بطارية LFP بسعة 32.66 كيلوواط ساعة ودي بتدي مدى كهربائي لوحده يوصل لـ 210 كم وده مناسب للاستخدام اليومي شغل مشاوير داخل المدينة اما المدى الاجمالي لما تكون البطارية مشحونة والخزان مليان فبيوصل لـ 1310 كم وده رقم ضخم جدا في السوق دي وبيخلي العربية مثالية للسفر الطويل من غير ما تقلق من الوقوف كتير للشحن

التصميم الخارجي والأبعاد

إكسيد قدمت تصميم بسيط وراقي في نفس الوقت الواجهة الأمامية شبه مغلقة مع اضاءة LED مميزة وده بيدي شكل كهربائي عصري ومن الجنب الخطوط ناعمة من غير تعقيد اما الخلف فالإضاءة ممتدة بعرض العربية وبتدي إحساس بالعرض والقوة أما الأبعاد فهي مناسبة جدا لعربية عائلية الطول 4780 مم العرض 1890 مم الارتفاع 1720 مم وقاعدة العجلات 2800 مم وده بيوفر مساحة كويسة جدا للركاب

تقنيات القيادة الذكية

النسخة الأعلى تجهيز من ET5 بتوصل بمستشعر LiDAR وده بيساعد بشكل كبير في تحسين قدرات القيادة الذاتية خصوصا على الطرق السريعة وبتستخدم السيارة منصة Horizon للقيادة الذكية مع شريحة قوية بتدي قدرة كبيرة على تحليل البيانات في وقت سريع وده بيخلي تجربة القيادة اسهل واذكى اما النسخ الأقل فبتجي من غير LiDAR لكنها بتحتفظ بمعظم تقنيات المساعدة الذكية الأساسية اللي المستخدم محتاجها يوميا