الجمعة، 29 مارس 2024

01:41 ص

مبتعرفش تشتم ! أومال اخدت الرخصة ازاي؟.. سخرية القيادة في مصر


اعتاد المصريون على مواجهة المواقف العصيبة التي تمر بها بلدهم بالسخرية و"الألش" وإطلاق النكات .. وتجاوباً مع أوضاع قيادة السيارات في مصر، فقد تداول نشطاء موقع التواصل الاجتماعي "فيسبوك" ما أطلقوا عليه "قواعد السواقة العشرة في مصر" وهي تعكس بشكل ساخر انطباعات ترقى إلى مرحلة القناعات .. ويعرضها "مارشدير" في السطور الآتية:

1 - هات عربية ميتزعلش عليها .

2 - شيل بكرامتك أي علامة عليها، بماركتها سواء تويوتا أو نيسان او غيرها، واعملها ميدالية لمفتاح العربية، برده عشان متتقهرش أوي وتفضل فاكر نوعها ، بدل ما غيرك يشيلها عشان يزين بيها التوكتوك أو الحنطور بتاعه .

3 - جيبها لونها فيراني، عشان متتحسرش أوي على كمية الخدوش والمطاوي اللي هتاخدها في وشها وانت راكنها تحت بيتك في أمان الله .

4 - المطبات ، ولنا هنا وقفة ، خد نفس عمييييق واتعامل معاها بمنتهى الهدوووء ، خد المطب في ساعة.. ساعتين.. براحتك خااااالص ، ويولع أي حد واقف وراك ، ماهو لو اخدته في وقت أقل من كده، مش بعيد تبيع العربية قطع غيار بعد أول مطب .

5 - متركزش أوي مع اشارات العربيات اللي قدّامك ، سواء داخل يمين او شمال، انت ركز مع اللي حادف نفسه من الشباك بنص جسمه عشان يشاور انه هيحود .

6- لو حد خبطك أو كسر عليك او دغدغلك العربية ، خد بعضك واجري من قدامه باللي اتبقى من العربية ، لانه متبرمج ينزل يضربك ويتبلى عليك ويلم عليك خلق الله ، وبعد ما يخلص التار اللي بينكم ، يرجع يكمل طريقه تاني ، ولو كان تاكسي ولا ميكروباص ،هتلاقي نفسك واقع بين مائة واحد، وكله عمال يقول لك ،ده راجل غلبان وبيشقى ومحدش ياخد على سواقته .

7 - السواقة هنا زي الرقص الفولكلوري ، انسى انك تمشي في حارة وغيرك ياخد حارة وهكذا ، انت وشطارتك كل ما تلاقي مكان فاضي نط فيه زي الشطرنج .

8 - إيّاك تقف عشان تعدي حد ماشي على رجله ، عشان متغضبش البهوات اللي في العربيات اللي وراك ومتتشتمش منهم بالكلكسات .

9 - اوعى تزعل او تاخد على خاطرك انك بترجع بيتك وانت واخدلك كام شتيمة، سواء كنت راجل او ست ، انت لو متشتمش اقلق .

10 - مبتعرفش تشتم ! أومال اخدت الرخصة ازاي؟

مارشدير

اسعار ومواصفات السيارات

البحث حسب الميزانية

البحث حسب الموديل

العودة للأعلى

search