logo
رئيس التحرير
إسلام حويلة

ads

بعد زيادة الأسعار.. إزاي توفر من "تلت" لـ"نص" تانك البنزين؟

مارشدير
عقب زيادة أسعار البنزين والسولار ، بدأت نصائح تقليل استهلاك الوقود بالانتشار ، منها الصحيح علميا ومنها غير ذلك ، وتحت عنوان ازاي توفر من تلت لنص التانك ، تم تداول نصائح قال كاتبها انه سائق في شركة توصيل عن طريق التطبيق الالكتروني ، جاء فيها :

اتعلمت من نفسي ومن سواقين تانيين ازاي اوفر من تلت لنص البنزين الي كنت بستهلكه:

-متملاش ابدا اكتر من نص التانك، ومتخليهوش يقل عن الربع، لو مليت التانك كله، استهلاكك هيزيد عشان وزن النص تانك الزيادة، ولو البنزين قل عن الربع في احتمالية ان الشوائب تدخل في دورة البنزين وتستهلك الطرمبة طاقة اكتر

-الـRPM ميعديش 2500 لـ 2750 وده احسن وقت تنقل الغيار وبيوازن بين استهلاك البنزين والاداء

-بلاش kick down او تسقيط نقلات وحرق او اي حاجة بتعلي الـRPM بسرعة، دايما خلي رجلك خفيفة عالبنزين والـRPM يعلى بالتدريج

-استغل عزم القصور الذاتي للعربية، لما العربية تكون مجمعة سرعة كويسة والـ RPM حولين 2500، شيل رجلك من عالبنزين ومتمورش ومتدوسش دبرياش، سيب الغيار زي ما هو على ال D أو الغيار المناسب عشان ساعتها العجل هو الي بيخلي الموتور يلف وميستهلكش نقطة بنزين، لو جبته على N الموتور بيسحب بنزين عشان ميقفش، الموضوع ده موفر بشدة، ومع الوقت هتتعلم تخلي معظم الوقت ماشي بالطريقة دي وقليل ما بتدوس بنزين

-رجلك خفيفة عالفرامل وفرمل من بدري وبراحة، بلاش تكبس جامد، لما بتفرمل جامد وتتحرك تاني بتحتاج بنزين كتير عشان تحرك العربية من حالة الثبات، لو بتهدي ورجلك خفيفة مش هتحتاج بنزين عشان تكمل حركة تاني ده غير ان السواقة هتبقا اريح، هتوفر بنزين كتير اوي

-شيل اي اوزان ملهاش لازمة في العربية، وشيل اي spoiler او اجنحة بتسبب downforce عالعربية، لو عندك شيالة فوق السقف وشلتها، هتوفر 20% من استهلاك البنزين، اقفل الازاز لو تقدر عشان تقلل الـdrag اكتر

-حاول لو ماشي في طريق فاضي انك تلاقي السرعة المناسبة، الي هيا اعلى سرعة ممكنة بمجرد تحسيس بسيط عالبنزين وعلى أعلى غيار وRPM اقرب ما يمكن لل 2500

-لو واقف في اشارة بعداد وقت او زحمة جامدة اقفل العربية، دي من اكتر الحاجات الي بتحرق بنزين

-في الصيف افتح الازاز لو بتتحرك ببطأ وافتح التكييف لو ماشي بسرعة لأن ساعتها بيستهلك بنزين اقل من لو فتحت الازاز على سرعة عالية ودايما اتاكد من فلتر التكييف

-كل شوية كدة هات اي سائل من الي بينضفو الكاربيراتير او ال injection واستعمله، بيحسن استهلاك البنزين واداء العربية، وكل فين وفين حط بنزين 95 هتحس بفرق شاسع

-حاول تمشي ورا عربية اكبر منك عشان تقلل من مقاومة الهواء، لو مشيت ورا عربية نقل كبيرة المقاومة هتقل بنسبة 90% والاستهلاك يقل بنسبة من 20-40%

-اعمل صيانة العربية اول باول واتاكد من ضغط العجل والترصيص وظبط الزوايا كل ده بيفرق في استهلاك البنرين

-غير الكاوتش لو عمره انتهى وخلى الجديد قدام لو جر أمامي والعكس لو دفع خلفي، ومتجبس كاوتش عريض، الرفيع استهلاكه للبنزين اقل).
ads